Ny ovimbazaha, izay atao hoe kambo, ovivory na ovy koa, dia zavamaniry misy vodiny azo hanina sady be tavolo, mitovitovy endrika amin’ ny vomanga, ao amin' ny fianakaviana Solanaceae. Solanum tuberosum ny anarany ara-tsiansa.
Ny vodin’ ny ovimbazaha dia anisan’ ny foto-tsakafon’ ny ankamaroan’ ny mponina amin’ ny faritra manana toetany antonony. Zavamaniry afaka velona mandritra ny taona ny ovimbazaha. Ny tahony, izay mety mahatratra iray metatra, dia afaka mitsangana na mandady. Maranitra ny raviny ary miloko fotsy na volomparasy na anelanelan’ izany ny voniny. Afaka mamoa misy vihiny maro ny ovimbazaha. Ny tahony sy ny raviny ary ny vodiny dia misy karazana alkalôida mahafaty atao hoe sôlaninina.
Avy any amin' ny tangoron-tendrombohitra Andes amin’ ny faritr’ i Pero ny ovimbazaha, any amin' ny tapany atsimo-andrefan' i Amerika Atsimo, ka efa fantatry ny olona tao hatramin' ny 8 000 taona lasa ny fampiasana azy.
Tamin' ny taonjato faha-16 izy vao nampidirin' ny Espaniôla tao Eorôpa. Niely haingana tany amin’ ny tany manana toetany antonony ny ovimbazaha, ary tamin’ ny fanombohan’ ny taonjato faha-18 vao tafiditra tao Amerika Avaratra ny fambolena azy. Tamin' ny taona 2015 dia firenene 150 mahery no mamboly azy eran' izao tontolo izao.
