Koca Mi'mâr Sinân Âğâ (turco osmanli: خواجه معمار سنان آغا; turco moderne: Mimar Sinan) (9 de maio 1490 - 8 de junio 1588) esseva le principal architecto ottoman e ingeniero civil pro le sultanes Suleiman, Selim II, e Murad III. Ille duceva plus que 300 structuras major e altere projectos, como su scholas primari islamic (sibyan mektebs).
Le filio de un mason, ille recipeva un education technic e deveniva un ingeniero militar. Ille se avantiava rapidemente in le rangos e deveniva un officiero e postea un commandante janissaro, con le titulo honorific de ağa. Ille meliorava su habilitates architectural e de ingenieria in su campanias con le janissaros, e se faceva experto de construer fortificationes e infrastructura militar, como camminos, pontes, e aqueductos. Al etate de 50, ille esseva nominate al position del architecto chef regal, usante su habilitates technic que ille apprendeva in le militar pro crear "edificios religiose fin". Ille reteneva iste posto usque su morte in le etate de 98.
Su obra maestro es le Moschea Selimiye in Edirne; su obra le plus famose es le Moschea Suleiman in Istanbul. Ille trainava plure assistentes qui deveniva architectos famose, como Sedefhar Mehmet Ağa, le architecto del Moschea del Sultan Ahmed. Mimar Sinan es considerate le melior architecto del architectura ottoman classic, e ille es frequentemente comparate con Michelangelo.
