Islamabad

El territoriu d’Islamabad está assitiau ena meseta de Pothohar, considerá unu delos primerus lugalis d’assentamientu umanu n’Asia. Angunus delos primerus utensilius dela Edá dela Piedra nel mundu s’han topau nesta meseta, i datan de haz 100 000 a 500 000 añus. Las piedras rudimentarias recuperás delas terrazas del ríu Soan dan testimoniu delos esfuerçus del ombri primitivu nel periodu interglacial.

Tamién s’han topau ogetus de cerámica i utensilius que datan dela preestoria. Las escavacionis del Dr. Abdul Ghafoor Lone destaparun evidencias duna coltura preestórica ena çona. S’han topau reliquias i cranius umanus que datan del 5000 a. C., lo que indica que la región albergó puebrus neolíticus que s’assentarun alas orillas del ríu Soan i que, posteriormenti —alreol del 3000 a. C.—, desenvolvierun pequeñas comunidais ena región.

La civilización del valli del Indu floreció ena región entre los sigrus Prantilla:Siglo i Prantilla:Siglo a. C. Nesta región tamién se desenvolvió una localidá budista.

Muchus delos grandis exércitus, comu los de Babur, Genghis Khan, Tamerlán i Ahmad Shah Durrani, gastarun el correol que atraviesa Islamabad nel su caminu pa invadil el restu del subcontinenti indiu. La Islamabad moerna s’assienta sobri l’antiguu assentamientu conocíu comu Saidpur. Los británicus tomarun el control dela región dendi 1849 i construirun nel territoriu el acantonamientu más grandi d’Asia meridional.

Construción i desenvolvimentu

Aquandu Pakistán consiguió la independencia en 1947, Karachi fue la su primera capital. En 1960 construyó-si Islamabad de a poquinu comu capital por varias razonis. Tradicionalmenti, el desenvolvimentu de Pakistán s’abía concentrau nel centru colonial de Karachi, i el presidenti Ayub Khan quería que se repartiera de manera más ten con ten. Por otru lau, Karachi tenía condicionis climáticas tropicalis i está assitiá nun estremu del país, polo que era vulnerabli alos ataquis dendi el mari Arábigu. Pakistán precisaba una capital que fuera fácilmenti accessibli dendi tolas partis del país. Karachi, centru de negocius, tamién se consideró inadecuá, en parti pola intervención delos interessis empresarialis enos assuntus del gobiernu. La nueva ubicación escogía pa Islamabad estaba más cerquina del quartel general del exércitu en Rawalpindi i del territoriu disputau de Cachemira, nel norti.

En 1958 se constituyó una comisión pa selecional un lugal adecuau pala capital del país, con especial atención ala ubicación, el climi, la logística i las necessidais de defensa, junta con otrus atributus. Endispués dun estudiu estensu, d’investigacionis i duna revisión eshaustiva delos lugalis potencialis, la comisión recomendó la çona noresti de Rawalpindi en 1959. Una empresa griega d’arquitetus, Konstantinos Apostolos Doxiadis, diseñó’l planu maestru dela ciá basau nun planu en cuadrícula, de forma triangular i col vértici orientau hazia las colinas de Margalla. La capital no fue trasladá diretamenti de Karachi a Islamabad: primero se trasladó temporalmenti a Rawalpindi, a prencepius delos añus sessenta, i endispués a Islamabad quandu los trebajus essencialis de desenvolvimentu acabun en 1966.

Estoria rezienti

Islamabad á atraíu genti de toas partis de Pakistán, polo que es una delas ciais más cosmopolitas i urbanizás del país. Comu capital, la ciá á acogíu varias reunionis importantis, comu la cumbri dela Associación d’Asia Meridional pala Cooperación Regional.

En otubri de 2005, la ciá sufrió angunus dañus por causa del terremotu de Cachemira, de magnitú 7,6. Islamabad á experimentau una serie d’incidentis terroristas, incluyendu’l de juliu de 2007 en Lal Masjid —Mesquita Roja—, el de juniu de 2008 contra la embaxá de Dinamarca i los bombardeus de Marriott de setiembri de 2008. En 2011 ocurrierun na ciá quatro incidentis terroristas, que matarun a quatro pressonas, entre ellas el entoncis gobernaol del Panyab, Salman Taseer.

Tamién ocurrierun aquí angunus trájicus acidentis aérius: el 28 de juliu de 2010, el vuelu 202 d’Airblue s’estrelló enas colinas Margalla, matandu alas 152 pressonas que iban a bordu; i el 20 d’abril de 2012, el vuelu 213 de Bhoja Air, que llevaba 121 passagerus, s’estrelló al realizal una aproximación final pal aterizagi.

Ayub Khan solicitó los servicius del arquitetu i urbanista griegu Constantinos Doxiadis comu consultol pala elección dela nueva ubicación dela capital. Finalmenti se escogió una çona junta ala antigua ciá de Rawalpindi, que fue designá capital temporal. A Jan le interessaba esta ubicación porque Rawalpindi era una ciá guarnición leal a él, i a Doxiadis le ofrecía la possibilidá de desenvolvel el su conceutu urbanu llamau "Dynápolis".

En 1959 se decidió la construcción dela ciá; en 1960 Doxiadis presentó los sus primerus estudius i en otubri de 1961 encetó la execución. En 1965 se construirun la Nuversidá d’Islamabad i la Nuversidá Quaid-i-Azam. El 26 d’otubri de 1966 la ciá cobró vida al ocupal-si el primer edificiu d’oficinas dela ciá, i en 1967 Islamabad se convirtió oficialmenti ena capital de Pakistán. Los trabajus de construcción acabarun a mediaus dela década de 1970.

La ciá presenta rasgus tantu dela arquitetura moerna comu dela antigua, siendu la Torre Saudi-Pak un güen exemplu d’ellu. La enormi Mesquita Faisal, unu delos edificius más representativus dela ciá, es conocía pola su singular arquitetura. Otrus edificius significativus dela ciá son l’edificiu dela Assambréa Nacional, diseñau por Louis I. Kahn, la Casa de Pakistán, ondi residi’l presidenti, los jardinis botánicus i l’edificiu dela Biblioteca Nacional.

La ciá está dividía en ochu çonas sigún la su utilidá: área residencial, área industrial, industria ligera, comerciu, distritu comercial, área educativa, enclavi diplomáticu i gobiernu, i ca una tien el su propiu parqui.

Islamabad está localizá enas coordenás 33°26′N 73°02′E / 33.43, 73.04, nel estremu norti dela meseta de Potohar, nel Territoriu Capital d’Islamabad. La su altitú es de 540 metrus. La capital moerna i la antigua ciá de Rawalpindi están una junta ala otra i son conocías comunmenti comu ciais gemelas; no dessisti una raya esata entre las dos ciais. Al noroesti dela ciá está la estación de montaña Murree, i al norti el distritu de Haripur en Jaiber Pajtunjuá. Kahuta se topa nel suresti; Taxila, Wah Cantt i el distritu d’Attock al noroesti; Gujar Khan, Rawat i Mandrah al suresti; i la metrópolis de Rawalpindi al sul i suroesti. Islamabad está localizá a 120 km de Muzaffarabad, a 185 km de Peshawar, a 295 km de Lahore i a 300 km de Srinagar, la capital de Jammu i Cachemira ena India.

La ciá d’Islamabad tien una estensión de 906 km². Amás, la ciá forma parti duna área de 2717 km² conocía comu Área Especificada, colas colinas Margala al norti i noresti. La parti sul dela ciá es una llanura ondulá, drená pol ríu Kurang, ondi se topa la pressa de Rawal.

Climi

El microclimi dela çona está regulau por tres lagus artificialis —Rawal, Simli and Janpur Dam—. La ciá tien un climi estremu, con vranus calientis i lluvias monzónicas que se producin en juliu i abostu, i iviernus más bien fríus que hazin neval enas colinas.

Islamabad tenía una puebración estimá de 805 235 abitantis sigún datús del censu de 1998, que, sigún la estimación dela Organización del Censu de Puebración de Pakistán, aumentó ata alreol de 2 millonis en 2012. El urdu, la lengua nacional i una delas lenguas oficialis del país, se palra principalmenti dientru dela ciá por causa dela mezcla étnica dela puebración. L’inglés tamién se gasta ampliamente. Otras lenguas incluyin el punyabí, el pastún i el pothohari. La lengua madri dela mayoría dela puebración es el punyabí. El 15 % dela puebración tien comu lengua madri’l sindhi, el 10 % el pastún i el 8 % otras lenguas. La mayoría dela puebración migranti dela ciá procedi de Punyab. Alreol de 590 614 emigrarun de Sind i Jaiber Pajtunjuá, 24 438 d’Azad Cachemira i 21 372 d’otrus paísis. Puebracionis menoris emigrarun delas çonas tribalis baxu alministración federal, Baluchistán i Gilgit-Baltistán.

Alreol del 59,38 % dela puebración se topa nel grupu d’edá de 15 a 64 añus. Solu’l 2,73 % dela puebración tien más de 65 añus; el 37,90 % tien menus de 15 añus. Islamabad tien la mayol tasa d’alfabetización de Pakistán, cun 88 %. El 9,8 % dela puebración tien educación intermedia —equivalenti alos graos 11 i 12—. El 10,26 % tien una licenciatura, mentris el 5,2 % tien una maestría. La fuerça de trabaju d’Islamabad es de 185 213 pressonas, i la tasa de paru es del 15,70 %.

El islam es la religión predominantí ena ciá, col 95,53 % de musulmanis. Enas çonas ruralis esti porcentagi es del 98,80 %, mentris enas çonas urbanas el porcentagi de musulmanis es del 93,83 %. La segunda religión es el cristianismu, col 4,07 % dela puebración, el 0,94 % enas çonas ruralis i el 5,70 % ena ciá. El hinduismu representa’l 0,02 % dela puebración, i otras minorías el 0,03 %.

Islamabad es contribuienti neta ala economía pakistaní, ya qu’enque tien solu’l 0,8 % dela puebración, aporta’l 1 % del PIB del país. La bolsa de valoris d’Islamabad, fundá en 1989, es la tercera más grandi de Pakistán endispués dela bolsa de valoris de Karachi i la de Lahore. La bolsa tien 118 biembrus, 104 pressonas jurídicas i 18 biembrus individualis. El volumin mediu diariu dela bolsa es de más dun millón d’acionis. Dendi 2012, la LTU d’Islamabad (Large Tax Unit) fue responsabli de 371 mil millonis de rupias n’engressus fiscalis, lo qu’equivali al 20 % del total delos engressus recaudáus pola Junta Federal de Recaudación.

Islamabad á experimentau una espansión delas tecnologías dela información i la comunicación, cola incorporación de dos Parquis Tecnológicus, que albergan numerosas empresas tecnológicas nacionalis i estranjeras. Los parquis tecnológicus están localizaus en Evacuee Trust Complex i Awami Markaz. Á 36 compañías de TI en Awami Markaz i 29 en Evacuee Trust. Los centrus de llamás pa empresas estranjeras son tamién otra área importanti de crecimientu; el gobiernu está haziendu esfuerçus pa reducil los impuestus ata nun 10 % pa fomentál las inversionis estranjeras nel setor delas tecnologías dela información. La mayoría delas empresas de propiedá estatal de Pakistán, comu PIA, PTV, PTCL, OGDCL i Zarai Taraqiati Bank Ltd., tienin la su sedi en Islamabad. Las sedis delos prencipalis operaores de telecomunicacionis, comu PTCL, Mobilink, Telenor, Ufone i China Mobile, se topan n’Islamabad.

Islamabad tien la tasa de mortalidá infantil más baxa del país, con 38 muertis por ca mil nacimientus, en comparación cola media nacional de 78 muertis por ca mil. El mayol hospital d’Islamabad es el Institutu de Ciencias Meicas de Pakistán (PIMS, polas sus siglas n’inglés). Fue establecíu en 1985 comu un institutu d’enseñança i formación de meicus. El PIMS funciona comu centru nacional de referencia i proporciona diagnósticus especializaus i servicius de tratamientu. El hospital tien 30 grandis departamentus meicus. El hospital d’Islamabad es el componenti prencipal, cunas instalacionis de 592 camas i 22 especialidais meicas i quirúrgicas. El hospital de niñus tien 230 camas i fue acabau en 1985. Contién seis grandis instalacionis: quirúrgicas i especialidais afinis, meicas i especialidais afinis, equipus de diagnósticu, quirófanu, cuidaus intensivus (NICU, PICU, aislamientu i serviciu d’emergencias) i un bancu de sangri. El centru de salú materno-infantil es un centru de formación, cun hospital anexu de 125 camas, qu’ofreci distintus servicius clínicus i operativus.

El Hospital General i Institutu d’Enseñança PAEC, fundau en 2006, está afiliau ala Comisión d’Energía Atómica de Pakistán. El hospital tien instalacionis con 100 camas i 10 departamentus: obstetricia i ginecología, pediatría, meicina general, cirugía, unidá de cuidaus intensivus/unidá de cuidaus coronarius, ortopedia, oftalmología, anatomía patológica, radiología i departamentu dental. El Hospital Enternacional Shifa es un hospital docenti n’Islamabad; fue fundau en 1987 i convertíu nuna compañía púbrica en 1989. El hospital tien 70 consultoris cualificaus n’ábati toas las especialidais, 150 camas i instalacionis en 35 especialidais diferentis. Sigún la Oficina Federal d’Estadística del Gobiernu de Pakistán, en 2008 había 12 hospitalis, 76 dispensarius i 5 Centrus de Maternidá i Bienestal Infantil ena ciá, cun total de 5158 camas.

Islamabad tien conexión colos prencipalis destinus del mundu graciâs al Aeropuertu Enternacional Benazir Bhutto, que dantis se llamaba Aeropuertu Enternacional d’Islamabad. Esti aeropuertu es el terceru de Pakistán i se topa fuera d’Islamabad, en Chaklala (Rawalpindi). Nel añu fiscal 2004/05 tuvo más de 2,88 millonis de passagerus i se registrarun 23 436 vuelus.

En Fateh Jang s’está construyendu’l nuevu aeropuertu dela ciá, el Aeropuertu Enternacional Islamabad Gandhara, pa hazel frenti al aumentu de passagerus. Quandu esti acabau, esti aeropuertu será’l más grandi del país. La su construcción costará 400 millonis de dólaris estadouniensi, i está previstu que remati en 2014.

Se puei il a toas las prencipalis localidais graciâs a trenis regularis dendi la estación ferroviaria d’Islamabad i a servicius d’otobús que salin principalmenti dela ciá vecina de Rawalpindi. Lahore i Peshawar están conectás con Islamabad por meyu duna red d’autopistas, que tien reducíu significativamenti la duración delos viagis entre estas ciais. La autopista M2 tien una longitú de 367 km i conecta Islamabad con Lahore. La autopista M1 conecta Islamabad con Peshawar i tien una longitú de 155 km. Islamabad está conectá con Rawalpindi pol Intercambiaol Faizabad, que tien un tráficu diariu d’alreol de 48 000 vehículus.

La ciá tien un complexu multideportivu ena çona d’Aabpara. Esti complexu incluyi’l Liaquat Gymnasium pala prática de deportis indoor, el Mushaf Squash Complex i el estadiu Jinnah palos deportis al airi libri, que es l’estadiu ondi normalmenti se disputan los encuentrus enternacionalis. Nesti estadiu se celebrarun los Juegus d’Asia del Sul de 2004.

Los prencipalis deportis ena ciá son el fútbol, el críquet, el squash, el hockey, el tenis de mesa i el boxeu. El Islamadab Golf Club tien 27 hoyus. Otrus campus de golf dela ciá son el Navy, con 18 hoyus, i el Air Force, con 9. Nel lagu Rawal á angunas instalacionis modestas pala prática de deportis acuáticus. Tamién á varias vías d’escalá enas Margalla Hills.