Dr Inhalt
S Mahabharata isch in achzää Kapitel und äi Appendix iidäilt. Es bestoot us ere Hauptgschicht und hunderte vo Nääbegschichte und chliinere Episode. Grundsätzlig beschäftigt sich s Epos mit alle Theme, wo im Hinduismus wichdig si: mit em Lääbe vo de Gschöpf, mit em Dood und dr Widergeburt, mit Karma und Dharma (Rächtschaffehäit), beschribt Glück und Läid, d Ergäbniss vo de guete und de schlächte Daate, s Opfer, und die verschiidene Zitalter, es beschäftigt sich mit de Götter und überliiferet uralti Hümne.
D Handlig beschribt dr Kampf vo zwäi verwandte Königsfamilie, de Kauravas und de Pandavas, uf em Schlachtfäld z Kurukshetra (nördlig vo Delhi). Es ist seer woorschinlig, ass es sich im Kärn um e historischs Eräignis handlet, e Hufe Inder lueg es as e Daatsach aa. Dr Kampf wird as schrecklge Bruederchrieg daargstellt, wo vili Opfer gforderet het. Er isch au dr dramaturgisch Hindergrund vo dr Bhagavad Gita („Gsang vo Gott“). D Pandavas gwünne d Schlacht, wo si aber e baar Joor spööter e Pilgerräis in d Himalaya mache, stärbe si äine noch em andere bis uf e Yudhishthira, wo as grächt gulte het. E Hündli foot em afo noochlaufe, bis dass er zum Himmelsdoor chunnt. Denn chunnt d Brüefig vom Yudhishthira und er muess sini Liebe under Kwaale in dr Höll go finde. Won er sä gfunde het, ziet er s vor, mit sinere Frau, sine Brüeder und em Hund in dr Höll z bliibe, as ooni die in Himmel z goo. Er verliert druf si menschlig Körper und er merkt, ass das alles nume e Däil vo sinere Brüefig gsi isch.
Litratuur
- Vishnu S. Sukthankar, Shripad Krishna Belvalkar u. a.: The Mahābhārata. 19 Bde. mit 2 Indexbänden. Bhandarkar Oriental Research Inst., Poona 1933–1972.
- Kisari Mohan Ganguli: The Mahabharata of Krishna-Dwaipayana Vyasa. Indien 1883–1896. Zuletzt als 4-bändige Taschenbuchausgabe: Munshiram Manoharlal, New Delhi 2004, ISBN 81-215-0593-3 (Onläin-Usgoob)
- Hermann Jakobi: Mahabharata, Inhaltsangabe, Index und Konkordanz der Kalkuttaer und Bombayer Ausgaben. Bonn 1903, Nachdruck: Hildesheim 1980, ISBN 3-487-07015-4. (Digitalisat)
- Vishwa Adluri und Joydeep Bagchee: The Nay Science: A History of German Indology. New York 2014. [1]
