Ehud Barak

Ehud Barak (gebore 12 Februarie 1942) is 'n Israelse linkse politikus en 'n voormalige generaal. Hy was die Tzahal (die Israelse Weermag) se opperbevelhebber as ook die eerste minister gewees.

Barak is gebore en het grootgeword in 'n kibboets naby die kusstad Netanya. Na sy verpligte militêre diens het hy 'n beroepsoldaat geword. Hy was 'n bevelvoerder van die elite spesiale-mageenheid Sayeret Matkal en is by allerlei operasies betrek, soos Operasie Entebbe in 1976. Uiteindelik is hy tot generaal bevorder en was van 1991 tot 1995 die Weermag se opperbevelhebber (Rav aluf). Saam met twee ander is hy die mees gedekoreerde soldaat in die Israelse geskiedenis.

In 1995 het hy na die politiek oorstap. As 'n lid van die HaAvoda-party (Arbeidsparty) het hy die minister van Binnelandse Sake in die Rabin II-kabinet, en 'n jaar later ook 'n lid van die Knesset geword. Vanaf 1999 tot 2001 was hy die tiende eerste minister, en leier van die Barak-kabinet. In Mei 2000 het hy die Israelse Weermag uit die suidelike Libanon laat terugtrek. In Julie 2000 het die Amerikaanse president Bill Clinton in Camp David in die Verenigde State probeer om vrede te bewerkstellig tussen Israel (verteenwoordig deur premier Barak) en die Palestyne (verteenwoordig deur president Jasser Arafat). Hierdie poging het vernaamlik uitgeloop op die verdeling van Jerusalem en die vraagstuk van die Palestynse vlugtelinge. In September 2000 het hy te make gekry met die Palestynse Tweede Intifada, wat uitgebreek het nadat Ariel Sharon die Tempelberg besoek het.

Na sy premierskap het Barak homself uit die politiek onttrek om in 2007 opnuut terug te keer. Van daardie jaar tot 2013 was hy die minister van Verdediging in die kabinette Olmert en Netanyahu II en opnuut van 2009 tot 2013 'n Knesset-lid.

Na hy die politiek in 2013 weereens verlaat het, het hy in 2019 die politieke party Israel Demokratiese Party gestig, wat in die verkiesing van September 2019 een setel gewen het, maar wat nie deur hom ingeneem is nie.

Ehud Barak is vir die tweede keer getroud en het drie kinders. Hy is 'n klassieke amateur-pianis, en het natuur- en wiskunde aan die Hebreeuse Universiteit van Jerusalem en toegepaste ekonomie aan die Stanford-universiteit studeer.