Nuuk vai Gothob (grenl.: Nuuk [nuːk]; dan.: Nuuk vai Godthåb «hüvätabaine toiv») om Danijan Grenland-avtonomijan administrativine keskuz da kaikiš suremb lidn. Vhesai 1979 lidnan oficialine nimituz oli Gothob; 19. i 20. voz'sadoiden purtkiš voib löuta mugažo Godtaab- da Godthaab-nimitusid.
Lidn om avtonomijan Sermersook-kundan (Kommuneqarfik Sermersooq-kommun) administrativižeks keskuseks da palaks.
Istorii
Lidn om pandud Hans Egede-norvegijalaižel vl 1728. Eländpunktad oliba olmas sarel sil aigal jo, kaikiš vanhemb eländpunkt om pandud 4 200 vot tagaz. Voz'sadoil 9.-15. skandinavijalaižed eliba läz nügüdläšt Nuukad, no hö jätiba sidä tahod möhemba. Eskimosalaižiden kezavasttusiden taho oli siš mugažo. Vl 1721 Egede tuli sinnä kändmaha hristanuskondha eskimosižid perehid. Hän nimiti lidnad Gothobaks (Godthåb, «hüvätabaine toiv»).
Vspäi 1979 lidnan üks'jäine oficialine nimituz om Nuuk jogahižel kelel.
Geografii
Lidn sijadase pol'sarel, Grenland-saren päivlaskmaižel randal, Nuup Kangerlua-fjordan lopus, kundan suvipäivlaskmas, 5 m ü.m.t. keskmäižel korktusel. Om mägid lidnan ümbrištos, znamasine om Sermitsiak (Sermitsiaq) 1210 m ü.m.t. kortte kaks'kümnes kilometras pohjoižpäivnouzmha.
Matkad Labradoran meren randhasai om kümne kilometrad. Tal'vkus päidub 10:00 aigal, tikahtuz om 14:30 aigal. Semendkun agjaspäi elokun augotišhesai vauktad öd oleskeldas lidnas, se sijadase 64°10' pohjoižlevedust i matkad Pohjoižhe polärižhe pirdhasai — 240 km pohjoižhe.
Lämän joksmusen taguiči meri Nuukan rindal ei jädu talvel, sikš elo naku ei ole mugoine jüged, kut saren toižiš paloiš.
Klimat om arktižen tundran. Keza om lühüd vilu pil'vekaz, tal'vaig om hätkeline, pimed da lumekaz, no ven lämudel. Voden keskmäine lämuz om −0,9 C°, heinkun-elokun +7,0..+7,4 C°, vilukun-keväz'kun −7,5..−8,6 C°. Kezaaigan minimum om −10,3 C° (kezaku), tal'vaigan maksimum om +15,3 C° (viluku). Voib olda pakaižid miččel taht kul (elokun minimum om −4,7 C°). Il'man lämuz voib ületada +12 C° tal'ven joga kul. Ekstremumad oma −32,5 C° (viluku) i +26,3 C° (heinku). Paneb sadegid 853 mm vodes, läz tazomäras kuidme, enamba elokus-sügüz'kus (91..105 mm kus), vähemba uhokus-kezakus (51..62 mm kus). Kun keskmäine relätivine nepsuz vajehtase 85..87 % röunoiš kezakus-elokus, 73..75 % kül'mkus-keväz'kus, 77..82 % toižiš kuiš.
Tobmuz
Sermersook-kundan municipaline nevondkund kogoneb 19 ühtnijaspäi. Kundan tobmuden pämez' (burgomistr, dan.: Borgmester i Sermersooq Kommune) om lidnan-ki pämehen.
Edeline Sermersook-municipalitetan pämez' om Šarlotta Lüdvigsen (Charlotte Ludvigsen, 2019−2022).
Eläjad
Vn 2015 andmusiden mödhe lidnan eläjiden lugu oli 16,992 ristitud. Kaik 18,326 eläjad oli lidnas vl 2020. Kaikiš suremb lidnan ristitišt om nügüd'.
Vl 2008 kaiken Sermersook-kundan ristitišt oli 20,998 eläjad, pind oli 635,6 tuhad km². Se om Grenlandan kaikiš suremb kund ristitišton mödhe, läz 15 tuhad ristituid elädas Nuuk-lidnas.
Galerei
