Салвадо́р, официална назва — Република Ел Салвадор, исп. El Salvador — держава в Середной Америцѣ, погранична з Гондурасом на востоку и сѣверѣ, и Гватемалов на западѣ, на югу омывана Тихым океаном.
Салвадор — найменша и найгустѣйше заселена краина меджи сѣмома штатами Середной Америкы.
Землепис
В середной части Салвадора лежить вулканична высочина 600-700 м.н.м. з пасмом вулканох од Санта Ана (2381 м.н.м.) западѣ до Сан Мигель (2129 м.н.м.) на востоку, найактивнѣйшый з них вулкан Изалко (1885 м.н.м.). На убочах — дубовы и сосновы лѣсы. Клима тропична, рочны опады на высочинѣ 1500-2500 мм, в долинѣ рѣкы Лемпа — 600-700 мм.
Найвысша точка Салвадора — верх Ел Питал, исп. Cerro El Pital (2730 м.н.м.), лежить на граници з Гондурасом.
Суть озера, што ся вытворили в зоз затопленых кратерох, з них найвекше Илопанго исп. Lago De Ilopango плохов до 100 км2 мать туристичный и рекреачный вызнам.
Довжина поземной границѣ з Гватемалов 203 км, з Гондурасом 342 км, берегова линия 307 км.
Обывательство
Официалный язык — испанскый. Гро обывательства — Салвадоряне, котры суть испано-индианскыма метисами (96%), друга найвекша и найстарша група Индиане. Европане чинять около 1% обывательства.
Густота заселѣня 230 особ/км2. Варощане чинили 42% обывательства (1983), але наслѣдком недостатка землѣ и политикы индустриализации днесь е пропорция обернена, в самом лем Сан Салвадору жие третина обывательства.
Салвадор единый зоз штатох Середной Америкы не мать африцкой популации, хоть в столици суть Салвадоряне з африцкыма корѣнями. Католицкый Салвадор — една з трьох держав свѣта (з Чиле и Никарагуа), де аборт без жадной выимкы е поза законом.
Економика
Експортуе каву, бавовну, цукрову тростину. Главны торговы партнеры: США, Германия, Япония. Главны приставы: Акахутла на востоку и Ла Уньон на западѣ. Пѣняжна единиця донедавна: колон. Од року 2004 колон перестав ходити и салвадорсков валутов став ся америцкый долар. Подля информации салвадорского амбасадора в США, четвертина Салвадорян працуе в США, а дому одсылать грошѣ, еще таке, кедь не векше, число заробкуе в США нелегално.
Политично-административне зряджѣня
Штат подѣленый на 14 департаменты (число, куртанка, назва испанска и русинска): 1 AH Ahuachapán Агуачапан;
2 CA Cabañas Кабаньяс; 3 CH Chalatenango Чалатенанго; 4 CU Cuscatlán Кускатлан; 5 LI La Libertad Ла Либертад; 6 PA La Paz Ла Паз; 7 UN La Unión Ла Унион; 8 MO Morazán Моразан; 9 SM San Miguel Сан Мигел: 10 SS San Salvador Сан Салвадор; 11 SV San Vicente Сан Висенте; 12 SA Санта Ана; 13 SO Sonsonate Сонсонате; 14 US Usulután Усулутан.
Урядный язык испанскый. На челѣ штату и влады стоить президент. Законодарный орган —еднокоморна Конштитучна асамблея.
Историчный вывой
Главны историчны добы Салвадора:
- 1524-1821 — Салвадор под владов Испании
- 1821-1838 — Салвадор входить в розличны федерации Середной Америкы
- 1838 — независимый Салвадор
- 1931-1944 — военна диктатура
- 1944-1980 — влада военных
- 1969 — фотбалова война з Гондурасом
- 1980-1992 — партизанска война лѣвых сил зоз владов
