Wikipedia iss ä fraii Innerned-Enzyklopädie unn iss am 15. Januar 2001 gegrinded worre. Des Word Wikipedia iss en Koffaword aus "Wiki" (hawaiianisch fer "schnell") unn "pedia" ausm englische Word "Encyclopedia", was eefach Enzyklopädie heeßt. Die Wikipedia iss in zahlraische Schbroochversione vorhande, unner annerem aa uff daitsche Dialegde wie em Pälzische. Die englischschbrachische Wikipedia hot iwwer 4,8 Millione, die Daitsch Wikipedia iwwer 1,8 Millione unn die Rheifränggisch Wikipedia 2000 Ardiggl (Schdond 15. Mätz 2015). Bai de Wikipedia konn jeder, uuõõgemeld odda nedd, schraiwe, wobai õõgemeld mehr Fungdsione zur Verfichung schdehe, z. B. Ardiggl verschiewe. Des Ziel vun Wikipedia iss es, Wisse so viel Lait wie meglisch zur Verfiechung zu schdelle. Desweche iss die Wikipedia aa nedd kommerziell unn finanzierd sisch dorsch Schbende.
Ämda
Die Wikipedianer, so nennd mer aggdive Midarwaider bai de Wikipedia, könne sisch in Poschde naiwähle losse. Verdrauenswirdiche Persone könne z. B. zum Adminischdrador gewähld werre, der guggd, ob uff de Wikipedia alls soi Rischdischkaid hot unn niemond vandalisierd. Dodefer schdehe ihm zusädzlische Fungdsione zur Verfiechung, z. B. Lesche vun Ardiggl odda Schberre vun Benudza. Es gebbd a Poschde, die uff de Metawiki, des heeßt uff alle Wikimedia-Projekde (Ufflischdung), bezooche sinn. Stewards z. B. könne uff all Projeggde Poschde ernenne.
Gschischd
Der Vorlaifer vun de Wikipedia iss die 2000 gegrindede Nupedia, die awwa nur 24 Ardiggl bis zur Uffleesung im Sebbdember 2003 erraischd hot. Awwa schun im Johr 2001 hawwe Jimmy Wales unn Larry Sanger die Wikipedia geschdarded, bai der im Gegesadz zur Nupedia jedermonn midschraiwe konn. Larry Sanger iss schbäda ausm Projeggd ausgedrede.
Im März 2001 is donn die Wikipedia uff Hochdaitsch geschdardet.
Am 20. Juni 2003 hot Jimmy Wales die Wikimedia Foundation gegrinded, die saiddem die Wikipedia unn die onneren Wikimedia-Projekde bedraiwd.
Unn seit em Novemba 2010 tuts die Pälzisch Wikipedia gewwe. 2013 iss se, noch ere Abschdimmung, um di Dialegde Hessisch, Lothringisch un Sidfränggisch zur Rheifränggische Wikipedia erwaiderd worre.
Schweschder-Projegde
Die Wikipedia iss des greeschd Projegd vun de Wikimedia, awwa es gibbd nuch onnere, nedd zu vernachlässichende Schweschderprojegde. Wie bai de Wikipediak konn do jeda midschraiwe.
- Wiktionary-Werderbuch
- Wikibooks-Leabiecha
- Wikiquote-Zidade vun beriemde Persenlichkaide
- Wikiversity-Leanbladdform
- Wikisource-hisdorische Kwällä
- Wikinews-Nochrichde
Seid 2013 gibts aach uf de Rheifränggische Wikipedia Schweschderprojegde:
- Wiktionary – Werderbuch
- Wikisource – Texde uf Rheifränggisch
- Wikiquote – Schprisch
- Wikinews – Nochrischde rund ums Rheifränggisch
- Wikibooks – Leabiecha
