Windhoek adolah ibu kota jo kota tagadang nagara Namibia nan talatak di tangah nagara di kawasan dataran tinggi Khomas. Pado tahun 2023, panduduaknyo bajumlah 486.169 jiwa nan taruih batambah dek pandatang dari wilayah lain di nagara tu. Ado babarapo teori babedo tantang baa kota ko mandapekan namonyo. Sabagian gadang urang picayo baasa dari kato Afrikaans wind (angin) jo hoek (sudut). Nan lain picayo baasa dari namo Pagunuangan Winterhoek nan ado di Afrika Selatan. Namonyo patamo kali disabuikan dalam surek Jonker Afrikaner kapado Joseph Tindall pado 12 Agustus 1844.
Pamukiman patamo di wilayah ko didirian dek Jonker pado tahun 1840 nan diagiah namo Orlam. Patikaian antaro suku Nama jo Herero maancuan pamukiman tu, jo pado 18 Oktober 1890 didirian pamukiman baru dek panjajah dari Jerman. Kuaso Jerman baakhia sairiang baakhianyo Parang Dunia I jo Windhoek alah jatuah sajak 1915. Pamukiman tu kamudian dikalola dek Afrika Selatan di bawah mandat Ligo Banso-Banso. Kota tu baru manjadi ibu kota nagara Namibia pado tahun 1990, katiko nagara tu mardeka.
