La senos es du protendes locada a la rejion ventral alta de la tronco de umanas e otra primates. Ambos sesos developa senos de la mesma texedas embriolojial. La grandia e developa relativa de la senos es un distingui major de seso du entre femes e mases. On ave ance un varia notable de grandia entre individuas. Femes umana es la sola mamales cual developa permanente senos a maturi sesal; tota otra mamales developa sua texeda mamelal en la periodo tarda de ensintia; a maturi sesal, estrojenes, en junta con ormon de crese, causa la crese permanente de senos.
En femes, la seno servi como la glande mamelal, cual produi e secrete lete per nuri bebes. Gras sucutanea covre e envelopa un rede de dutos cual converje a la teta, e esta texedas dona a la seno sua grandia e forma globin distinguinte. A la finis de la dutos es lobulos, o grupos de alveolos, do lete es produida e retenida en responde a siniales ormonal. En ensintia, la seno responde a un interata complicada de ormones, incluinte estrojenes, projesterona, e prolactina, cual media la completi de sua developa, pd la maturi lobuloalveolal, en prepara per leti e teti.
En ajunta a sua funsiona major en furni nuri per bebes, alga cultures asinia cualias sosial e sesal a senos fema, e pote regarda senos nuda en publica como nonmodesta o osena. Senos ia es mostrada en sculta, arte, e fotografia antica e moderna. Senos pote representa fertilia, femia, o abunda. Los pote es un parte importante en la persepi de la corpo e la atraosia sesal de un fem. Senos, spesial la tetas, pote es un zona erojen.
