Punjab (Punjabi, Urdu: پنجاب,; tisingkat PB), dilom sajarahna tikonal rik Panchanada rik Pentapotamia, joda da provinsi di Pakistan. Tipik di wilayah tongah-darak nagara, Punjab joda da provinsi paling balak karuwa di Pakistan nurut borakna rik paling balak jumlah pandudukna. Lahore joda da bandar nagorina rik kota paling balak di provinsi hasa. Kota balak barihna joda da Faisalabad, Rawalpindi, Gujranwala rik Multan.
Baruyut Kata
Golar "Punjab" titogak jak ruwa kata jak lom Basa Parsiya (پنج, panj, 'lima' rik آب, āb, 'uway'), say lokok sarumpun rik kata dilom basa Sanskerta (पञ्च, pañca, 'lima' rik अप्, áp, 'uway'). Kata pañj-āb joda da injam horti jak Indo-Arya pañca-áp rik hortina "Tanoh jak Lima Uway", say ngarujuk guk batangari Jhelum, Chenab, Ravi, Sutlej, rik Beas. Kaunyinna joda da anak batangari jak Way Indus, way Sutlej say paling balak. Rujukan Tanoh jak Lima Uway tihalui dilom Mahabharata, say salah osay wilayah tigolari Panchanada (Sanskrit: पञ्चनद, romanized: pañca-nada, lit. 'lima way'). Jolma Yunani Bahari ngarujuk guk wilayah Pentapotamía (Greek: Πενταποταμία), say hortina goh-goh da rik Punjab ho jona. Awalna, Punjab tikonal munih rik golar सप्त सिन्धु, Sapta Sindhu, 'Pitu Uway' dilom Rigweda rik Hapta Hendu dilom Avesta, say tihortiko jadi "Tanoh jak Pitu Uway"; ruwa batangari say barihna hasa joda da Indus rik Kabul say lokok tikuruk dilom wilayah Punjab Raya. Golar ganta sa pay tikonal di zaman Mughal.
