MacOS

Izrabotyvanje

Historija stvorjenja budučej macOS počela se v firmě NeXT, osnovanoj Stivom Džobsom poslě jego izhoda iz Apple v 1985 godu. Tam byla razrabotana Unix-podobna operacijna sistema NeXTSTEP, ktora byla izpuščena v 1989 godu. Jedro NeXTSTEP jest osnovano na jedru Mach, prvonačelno razrabotanom v Universitetu Karnegi-Melona, s dodatnymi slojami jedra i nizkouravenjenym kodom prostora koristnika, pozajetym iz čestej FreeBSD i drugyh operacijnyh sistem BSD. Grafičny interfejs koristnika byl sbudovany povrh objekt-orientovanogo nabora instrumentov GUI s koristanjem jezyka programovanja Objective-C.

Podčas 1990-h godov Apple probovala stvoriti operacijnu sistemu "nastupnogo pokoljenja" zaměsto klasičnoj Mac OS prěz projekty Taligent, Copland i Gershwin; jednako vse oni po izhodu byli ostavjene. To privedlo k nabytju Apple'om NeXT'a v 1997 godu, čto pozvolilo NeXTSTEP, pozdněje nazvanoj OPENSTEP, stati osnovoju dlja nastupnoj operacijnoj sistemy Apple. Tuto nabytje takože privedlo k v vozvračenju Stiva Džobsa v Apple kako medžučasnogo i potom stalogo generalnogo direktora, ktory rukovodil prěobraženjem udobnoj dlja programistov OPENSTEP v sistemu, ktora byla by prijeta osnovnym trgom Apple – domašnjimi koristateljami i tvorčjimi profesionalami. Projekt nabyl kodovu nazvu "Rhapsody" prědže čim sebe nabyti oficialnu nazvu Mac OS X.

Mac OS X

"X" v nazvě Mac OS X odobražaje rimsko čislo "deset", i Apple stvrdila, že v tutom kontekstu "X" potrěbno izgovarjati kako "deset"; ale obyčno to takože izgovarjaje se kako "iks". iPhone X, iPhone XR i iPhone XS takože potom poslědovali tutomu pravilu.

Prědhodne versije klasičnoj Mac OS nazyvali se arabskymi ciframi, kako napriklad Mac OS 8 i Mac OS 9. Do macOS 11 Big Sur, vsim versijam OS prisvajali se nomera v formatu 10.x, i toj format ostaval se od Mac OS X 10.0 do 10.15; počinajuči s macOS 11, Apple stala posluživati cěločislnymi nomerami versij, ktore uveličivali se na jedinicu s každym osnovnym izpuščenjem.

Prva versija Mac OS X, Mac OS X Server 1.0, byla prěhodnym iztvorom, imajučim interfejs, napominajuči klasičnu Mac OS, ale ona byla nekompatibilna s programnym zabezpečenjem iz staroj sistemy; spotrěbiteljske versije Mac OS X vključali v sebe širšu obratnu suměstimost. Aplikacije Mac OS možno bylo prěpisati dlja nativnoj raboty črěz API Carbon, a mnoge iz njih takože mogli rabotati bezposrědno črěz klasičnu obsrědinu, ale i so smenšenjem produktivnosti.

Spotrěbiteljska versija Mac OS X byla izpuščena v marcu 2001 goda zajedno s Mac OS X 10.0. Odzyvy byli protivrěčne: mnogi hvalili ju za novy krasivy i blěsklivy interfejs Aqua, ale kritikovali za medlu rabotu. Iz-za smenšenja popularnosti Apple, razrabotnik FrameMaker, Adobe Inc., odkazal se od razrabotanja novyh versij za Mac OS X. Kolumnist iz Ars Technica Джон Сиракуза (John Siracusa)John Siracusa (Džon Sirakuza), ktory recenzoval vse osnovne izpuščenja OS X do versije 10.10, opisyval rannje versije kako "strašno medle, s maloju kolikostju funkcij", a Aqua – kako "nesnosno medlu i požirajuču ogromne resursy".

Firma Apple bystro razrabotala nekoliko novyh versij Mac OS X. V oktobru 2001 goda Apple izpustila Mac OS X 10.1, ktora prinesla red izlěpšenij, povyšajučih udobstvo koristanja. Počinajuči januarom 2002 goda, Apple ustanovila Mac OS X kako prědustavjenu operacijnu sistemu na vsih kompjuterah Mac. Potom v tom že godu Apple izpustila Mac OS X Jaguar (versija 10.2), prvu versiju, ktora publično koristala svoju kodovu nazvu v marketingu i reklamě. Kogda v 2003 godu izšla Mac OS X Panther (10.3), Sirakuza primětil: "Divno, že poslě mnogyh lět neoprěděljenosti i "pustyh obečanij" my jesmo prěšli k stabilnomu každogodnomu izpuščenju velikyh novyh operacijnyh sistem". Mac OS X Tiger (10.4), izpuščena v 2005 godu, šokovala rukovoditeljev Microsoft, prědloživši red funkcij, takyh kako bystry poisk fajlov i ulěpšeno obrabotanje grafiky, ktore Microsoft nekoliko lět pytala se dodati v Windows Vista s dozvolimoju produktivnostju.

Po měrě razvivanja operacijnoj sistemy, ona odhodila od klasičnoj Mac OS, aplikacije dodavali se i odstranjali se. Razgledajuči muziku ključnym trgom, Apple razrabotala muzikalny plejer iPod i muzikalno programno zabezpečenje dlja Mac, vključajuči iTunes and GarageBand. Orientujuči se na spotrěbiteljsky i media-trgy, Apple sdělala akcent na svojih novyh aplikacijah dlja "digitalnogo obraza žitja", takyh kako paket iLife, integrovane domašna zabava črěz mediacentr Front Row i veb-prěgledač Safari. S rastom popularnosti interneta Apple prědložila dodatne onlajn-servisy, vključajuči .Mac, MobileMe i iztvory iCloud. Pozdněje firma počela prodavati postranne aplikacije črěz Mac App Store.

V bolje novyh versijah Mac OS X takože byli vnesene izměnjenja v obči interfejs, odkazavši se od pružnogo blěska i prozračnosti početkovyh versij. Něktore aplikacije sut stali koristati vněšnji vid s efektom šlifovanogo metala, ili bez pružnyh zaglavij v Mac OS X Tiger. V Mac OS X Leopard (10.5), Apple oglasila unifikaciju interfejsa so standardnym stiljem okon s sěrym gradijentom.

V 2006 godu sut byli izpuščene prve kompjutery Mac na osnově procesorov Intel so specalizovanoju versijeju Mac OS X Tiger.

Ključnym dějanjem dlja sistemy stalo anonsovanje i izpuščenje iPhone, počinajuči s 2007 goda. V toj čas kako prědhodne media-plejery iPod koristali minimalnu OS, iPhone koristal operacijnu sistemu na osnově Mac OS X, ktora pozdněje stala nazyvati se iPhone OS, a potom – iOS. Jednočasno izpuščenje dvoh operacijnyh sistem na osnově jednih i tyh že frejmvorkov stvoril napruženje dlja Apple, ktora utvrždala, že iPhone iznudil ju odložiti izpuščenje Mac OS X Leopard. Jednako, poslě togo, kako Apple odkryla iPhone dlja postrannyh razrabotnikov, jego komercialny uspěh privlěkl zauvaženje k Mac OS X, i mnoge razrabotniki softvera dlja iPhone sut projavili interes k razrabotanju dlja Mac.

V 2007 godu izšla Mac OS X Leopard s universalnymi binarnymi komponentami, dopuščajučimi ustanavjati ju kako na kompjutery Mac s procesorami Intel, tako i na něktore kompjutery Mac na procesorah PowerPC. To je takože poslědnja versija s poddrživanjem kompjuterov Mac s PowerPC. V 2009 godu Mac OS X Snow Leopard (10.6) stala prvoju versijeju Mac OS X, stvorjenoju jedino dlja kompjuterov Mac s procesorami Intel, i poslědnjeju versijeju s poddrživanjem 32-bitnyh kompjuterov Mac s procesorami Intel. Nazva dolžna byla označiti jej status kako iteracija Leopard, orijentovanoj na tehnične ulěpšenja i povyšenje produktivnosti, a ne na koristateljske funkcije, čto i bylo javno označeno razrabotnikami. S momenta jej izpuščenja nekoliko versij OS X ili macOS (imenno OS X Mountain Lion, OS X El Capitan, macOS High Sierra, i macOS Monterey) slědujut tutoj shemě, imajuči nazvu, podobnu prědhodniku, kako v 'tick–tock' modelu nazv, ktory koristaje Intel.

Počinajuči s 2011 goda, s izpuščenjem Mac OS X 10.7 Lion i OS X 10.8 Mountain Lion, Apple obnovila něktore aplikacije na velmi skevomorfny stilj dizajna, nadohnuty onogdašnjimi versijami iOS, jednočasno uprostivši něktore elementy, stvorivši jih, kako napriklad, prugu prokručenja, plavno izčezajučimi, kogda oni ne koristajut se. Toj směr, kako i interfejsy s efektom šlifovanogo metala, byl nepopularny srěd něktoryh koristateljev, ale on prodolžil tendenciju k večšej animacije i raznorodstvu v interfejsu, kako to balo raněje v utilitě backup interfejsa Time Machine.. Čto vyše, s izpuščenjem OS X Lion, Apple prěstala izpuščati oddělne serverne versije Mac OS X, prodavajuči serverne instrumenty kako oddělno daunlodujeme aplikacije črěz Mac App Store. V jednom iz prěgledov tendencija v servernyh iztvorah opisyvala se kako "veče nedraga i prosta... so izměščenjem akcenta s velikyh prědprijemstv na male".

OS X

V 2012 godu, s izpuščenjem OS X Mountain Lion, nazva sistemy byla oficialno skračena s Mac OS X do OS X, poslě togo, kako v prědhodnoj versiji analogičnym obrazom byla skračena nazva sistemy godom raněje. V tym že godu Apple uvoljnila glavu razrabotanja OS X, Skota Forstola, i dizajn byl izměnjeny v směru večšego minimalizma. Novy dizajn koristateljskogo interfejsa Apple, koristajuči gluboku nasyčenost kolora, knopky jedino s tekstom i minimalističny "plosky" interfejs, byl prědstavjeny s iOS 7 v 2013 godu. Pokud inženjeri OS X rabotali nad iOS 7, versija, izpuščena v 2013 godu, OS X Mavericks (10.9), byla prěhodnym izpuščenjem, v kotorom byli odstranjene něktore elementy skevomorfnogo dizajna, v toj čas kako večša čest občego interfejsa Mavericks ostala se neizměnnoju. Nastupna versija, OS X Yosemite (10.10), nabyla dizajn, podobny iOS 7, ale s večšeju složenostju, godečej se dlja interfejsa, kontrolujemogo myšju.

Počinajuči 2012-m godom, sistema prěšla na každogodny razklad izpuščenja obnovjenij, analogičny razkladu do versije 10.4 Tiger. Takože postupno snižala se cěna obnovjenij, počinajuci s Snow Leopard, a potom i sovsim anulacija platy za obnovjenje od OS X Mavericks. Něktore žurnalisti i postranne razrabotniki programnogo zabezpečenja prědpoložili, že tuto postanovjenje hoti i pozvolilo bystrěje izpuščati nove funkcije, označalo menše možnostij dlja povyšenja stabilnosti, i ni jedna versija OS X ne prěporučaje se koristateljam, ktorym stabilnost i produktivnost važněje novyh funkcij. Obnovjenje Apple 2015 goda, OS X El Capitan (10.11), bylo anonsovano susrědotočenym na ulěpšenju stabilnosti i produktivnosti.

macOS

V 2016 godu, s izpuščenjem macOS Sierra (10.12), nazva sistemy byla izměnjena s OS X na macOS, da by ona podhodila brendingu drugyh operacijnyh sistem Apple: iOS, watchOS, i tvOS. V macOS Sierra dodali Siri, iCloud Drive, poddrživanje "picture-in-picture", režim "Night Shift", ktory prěključaje displej na veče teple kolory nočju, i dvě funkcije Continuity: Universal Clipboard, ktory sinhronizuje bufer obměna koristatelja na vsih jego devajsah Apple, i Auto Unlock, ktory može razblokovati Mac s pomočju Apple Watch. V macOS Sierra takože dodali poddrživanje fajlovoj sistemy Apple APFS, nastupnicu zastarěloj HFS+. macOS High Sierra (10.13), izpuščena v 2017 godu, vklučala ulěpšenja produktivnosti, poddrživanje Metal 2 i HEVC, a takože sdělala APFS prědustavjenoju fajlovoju sistemoju dlja butovanyh SSD.

Jej nastupnuk, macOS Mojave (10.14), byl izpuščeny v 2018 godu, dodavši temny režim i dinamično nastavjenje tapet. V 2019 godu jego směnila macOS Catalina (10.15), ktora zaměnila iTunes oddělnymi aplikacijami dlja raznyh tipov multimedia i prědstavila sistemu Catalyst dlja portovanja aplikacij iOS.

V 2020 godu na konferenciji WWDC Apple anonsovala macOS Big Sur (versija 11). To bylo prvo uveličenje osnovnogo nomera versije macOS s momenta izhoda publičnoj versije Mac OS X Public Beta v 2000 godu; obnovjenjam macOS Big Sur prisvajali se nomery 11.x, podhodeče shemě numeracije versij, koristajemoj drugymi operacijnymi sistemami Apple. Big Sur vnesla značne izměnjenja v koristateljsky interfejs i stala prvoju versijeju, rabotajučeju na procesorah Apple Silicon, ktore sut osnovane na arhitekturě ARM. Sistema numeracije, počevša se s Big Sur, prodolžila se v 2021 godu s macOS Monterey (12), v 2022 godu s macOS Ventura (13), v 2023 godu s macOS Sonoma (14), i v 2024 godu s macOS Sequoia (15).

S 2025 goda, počinajuči s macOS Tahoe (versija 26), v cěljah unifikacije, nomery versij vsih operacijnyh sistem Apple budut oprěděljati se godom, slědujučim za godom jih izpuščenij. macOS Tahoe takože vključaje v sebe novy koristateljsky interfejs Liquid Glass, ktory bude koristati se i na drugyh platformah Apple, unifikujuči jihny jezyk dizajna. Tahoe stane poslědnjeju versijeju macOS, rabotajučeju na kompjuterah Mac s procesorami Intel.

Hronologija izpuščenij

Versije Mac OS X byli nazvane v imenu velikyh kotov, za izključenjem Mac OS X Server 1.0 i originalnoj publičnoj beta-versije, počinajuči s Mac OS X 10.0 i do OS X 10.9 Mavericks, potom Apple prěšla na koristanje nazv kalifornijskyh měst. Do svojego izpuščenja versija 10.0 vnutri Apple nosila kodovu nazvu "Cheetah", a Mac OS X 10.1 kodovu nazvu "Puma". Poslě silnoj reakcije okolo Mac OS X 10.2, s kodovoju nazvoju "Jaguar", marketing produktov Apple počel javno koristati kodove nazvy dlja promovanja operacijnoj sistemy. Mac OS X 10.3 prodavala se pod nazvoju "Panther", Mac OS X 10.4 kako "Tiger", Mac OS X 10.5 kako "Leopard", Mac OS X 10.6 kako "Snow Leopard", Mac OS X 10.7 kako "Lion", OS X 10.8 kako "Mountain Lion", i OS X 10.9 kako "Mavericks".

"Panther", "Tiger" i "Leopard" sut zaregistrovane kako tovarne znaky Apple, ale "Cheetah", "Puma" i "Jaguar" nikogda ne byli registrovane. Apple takože zaregovala tovarne znaky "Lynx" i "Cougar", jednako termin jih izkoristanja iztěknul i ne byl prodolžen. Firma Tiger Direct, ktora zajmala se prodavanjem kompjuterov, podala sudnu žalobu na Apple za koristanje nazvy "Tiger". 16 maja 2005 goda Federalny Sud SŠA v Južnom okrugu Floridy postanovil, že koristanje Apple nazvy "Tiger" ne narušaje tovarny znak Tiger Direct.

V osnově macOS leži operacijna sistema, kompatibilna s POSIX, postrojena na jedru XNU, (ktoro vključaje v sebe značnu čest jedra FreeBSD) i koristateljskom prostoru FreeBSD dlja standartnyh možnostij Unix dostupnyh iz komandnoj linije. Apple izpustila tuto sěmejstvo programnogo zabezpečenja kako bezplatnu operacijnu sistemu s otvorjenym izvornym kodom pod nazvoju Darwin. Povrh Darwina, Apple dodala red komponentov, vključajuči interfejs Aqua i Finder, da by dokončiti stvorjenje operacijnoj sistema na osnově GUI, ktoroju jest macOS.

Prvonačelno prědstavjena kako Mac OS X, sistema privnesla red novyh možnostij, zabezpečivši vyše stabilnu i věrodostojnu platformu, než jej prědhodnica, klasična Mac OS. Napriklad, izměščajuča mnogozadanost i zaščita pameti sut ulěpšili sposobnost sistemy startovati několiko aplikacij jednočasno, ne dozvaljajuči jih prěryvanja ili poškodženja. Mnoge aspekty arhitektury macOS sut pozajmane iz OPENSTEP, ktora byla razrabotana s obzirom na prěnosnost, da by ulegšiti prěhod s jednoj platformy na drugu. Napriklad, NeXTSTEP byla portovana s originalnyh rabotnyh stancij NeXT na osnově 68k na arhitekturu x86i druge do togo, kako NeXT byla nabyta Apple, a OPENSTEP pozdněje byla portovana na arhitekturu PowerPC kako čest projekta Rhapsody.

Do izpuščenja macOS High Sierra, i na diskah, različnyh od SSD, prědustavjenoju fajlovoju sistemoju byla HFS+, naslědžena od klasičnoj Mac OS. Razrabotnik operacijnoj sistemy Linux Linus Torvalds kritikoval HFS+, nazyvajuči ju "věrojetno, najgoršeju fajlovoju sistemoju iz kogda-libo egzistovavših", čij ustroj "aktivno poškodžaje koristateljske dane". On kritikoval nečutlivost imen fajlov k registru, čto ješče vyše pogoršilo se poslě togo, kako Apple azširila fajlovu sistemu dlja poddrživanja Unicode.

Podsistema Darwin v macOS upravjaje fajlovoju sistemoju, vključajuči rang dozvoljenij Unix. V 2003 i 2005 godah dva redaktora Macworld kritikovali shemu dozvoljenij. Ted Landau nazval nepravilno nastavjene dozvoljenja "najrazprostranjenějšim problemom" v macOS, a Rob Grifits prědpoložil, že něktorym koristateljam, věrojetno, až potrěbno resetovati dozvoljenja každy denj, čto može zajmati do 15 minut. Nemnogo pozdněje, drugy redaktor Macworld, Den Frejks, nazval proceduru izpravjenja dozvoljenij nadměrno koristajemoju. On utvrdžaje, že macOS obyčno obrabotyvaje dozvoljenja naležitoju metodoju bez vměšanja koristatelja, i reset dozvoljenij potrěbno prědprijmati jedino pri pojavjenju problemov.

Arhitektura macOS vključaje v sebe mnogorangovu strukturu: mnogorangove frejmvorky pomagajut bystromu razrabotanju aplikacij, podavajuči egzistujuči kod dlja razrěšenja občih zadanij. Apple podavaje vlastne instrumenty razrabotanja programnogo zabezpečenja, najvyše znajemym iz ktoryh jest IDE Xcode. Xcode podavaje interfejs dlja kompilatorov, poddrživajučih několiko jezykov programovanja, vključajuči C, C++, Objective-C, i Swift. Dlja prěhoda Mac'ov na procesory Intel, on byl modifikovany takym sposobom, da by razrabotniki mogli stvarjati svoji aplikacije ako universalny binarny fajl, čto zabezpečaje suměstimost kako s procesorami Intel, tako i s PowerPC iz reda Macintosh. Aplikacije vlastnyh i postrannyh razrabotnikov možno upravjati programno s koristanjem frejmvorka AppleScript, shranivšego se od klasičnoj Mac OS, ili s koristanjem vyše novoj aplikacije Automator, ktora prědlagaje prědběžno napisane zadanja, ne trěbujuči znanij programovanja.

Programna suměstimost

Gledite takože: Spisok program dlja Mac

Apple prědlagala dva osnovnyh API dlja razrabotanja programnogo zabezpečenja, početkovo prěznačenogo dlja macOS: Cocoa i Carbon. Cocoa byl nastupnikom API, naslědovanyh od OPENSTEP i ne imal analogov v klasičnoj Mac OS, onogda kako Carbon byl adaptacijeju API iz klasičnogo Mac OS, dozvaljajučeju minimalno prěpisyvati programno zabezpečenje dlja Mac, da by ono rabotalo nativno v Mac OS X.

API Cocoa byl izrabotany v rezultatu surabotničstva firm NeXT Computer i Sun Microsystems. Tuto naslědstvo jest mnogo primětno dlja razrabotnikov v Cocoa, pokoliko prěfiks "NS" povseměstno koristaje se v frejmvorku, označajuči NeXTSTEP ili NeXT/Sun. Oficialny API OPENSTEP, opublikovany v septembru 1994 goda, stal prvym, razdělivšim API medžu Foundation i ApplicationKit, i prvym, izkoristavšim prěfiks "NS". Tradicijno programy Cocoa osnovno pisali se na Objective-C, a Java koristala se kako alternativa. Jednako, 11 julija 2005 goda Apple oglasila, že "funkcije, dodane v Cocoa v versijah Mac OS X poslě 10.4, ne budut dodane v programny interfejs Cocoa-Java". Raněje macOS takože poddrživala platformu Java kako "prědpočitany programny paket" – na praktikě to označalo, že aplikacije, napisane na Java, maksimalno dobro podhodili operacijnoj sistemě, ostavajuči se pri tom krosplatformeno kompatibilnymi, a grafične koristateljske interfejsy, napisane na Swing, izgledali bliz jednako, kako nativne interfejsy Cocoa. S 2014 goda Apple promuje svoj novy jezyk programovanja Swift kako prědpočitajemy jezyk dlja razrabotanja programnogo zabezpečenja na platformah Apple.

Prvonačelny plan Apple s macOS byl v tom, da by obvezati vsih razrabotnikov prěpisyvati svoje programno zabezpečenje na Cocoa API. To izzvalo veliky protest srěd egzistujučih Mac-razrabotnikov, ktore grozili odkazati se od platformy zaměsto tomu da by vkladati se v dragokoštujuče prěpisyvanje, i od toj ideje odkazali se. dlja zabezpečenja plavnogo prěhoda od Mac OS 9 k Mac OS X, byl izrabotany Carbon API. Aplikacije, napisane na Carbon početkovo mogli rabotati kako na klasičnoj Mac OS, tako i na Mac OS X, ale potom tuta možnost byla odstranjena po měrě razvivanja Mac OS X. Carbon ne byl vključeny v prvy iztvor Mac OS X: malokoristajemo originalno izpuščenje Mac OS X Server 1.0, ktory takože ne vključal interfejs Aqua. Počinajuči s Leopard, Apple ograničila daljše razrabotanje Carbon i oglasila, že aplikacije Carbon ne budut rabotati v 64-bitnom rezimu. Jednako, red aplikacij macOS prodolžal koristati Carbon ješče něktory čas poslě togo, osoblivo te, ktore proizhodili s doby klasičnoj Mac OS i dlja ktoryh obnovjenja byli by trudnymi ili nepotrěbnymi. K njim odnoset se Microsoft Office do Office 2016, i Adobe Photoshop do CS5. Rannje versije macOS takože mogli odkryvati něktore aplikacije klasičnoj Mac OS posrědstvom Classic Environment s ograničenjem produktivnosti; tuta funkcija byla odstranjena, počinajuči s versije 10.5 na vsih Mac'ah s procesorami Intel.

Pokoliko macOS naleži standardu POSIX, mnoge programne pakety, napisane dlja drugyh Unix-podobnyh sistem vključno Linux, mogut byti prěkompilovane dlja raboty na njej, vključno i mnogyh naučnyh i tehničnyh program. Postranne projekty, take kako Homebrew, Fink, MacPorts i pkgsrc zabezpečajut prědběžno skompilovane ili odformatovane pakety. Apple i druge firmy sut dodali versije grafičnogo interfejsa X Window System ktore dozvaljajut tutym aplikacijam rabotati s interfejsom, priblizno imitujučim macOS. Tutčas Apple prěporučaje koristati projekt s otvorjenym izvornym kodom XQuartz; ranše versije mogli koristati aplikaciju X11, dostavjenu Apple, a ješče ranše – projekt XDarwin.

Aplikacije mogut razprostranjati se na kompjutery Mac i instalovati se koristateljem iz vsakogo izvora i vsakym sposobom, napriklad, s pomočju daunlodovanja (s digitalnym podpisom ili bez, dostupnym črěz konto razrabotnika Apple) ili črěz Mac App Store, magazin programnogo zabezpečenja, poddrživajemy Apple posrědstvom procesa, potrěbujučego odobrjenje firmy. Aplikacije, instalovane črěz Mac App Store, rabotajut v izolovanoj obsrědině (pěskovišču), čto ograničaje jihnu možnost obměnjovati se informacijeju s drugymi aplikacijami ili izměnjati jedro operacijnoj sistemy i jej funkcije. Tuto razgledajut kako vyšnost, dozvaljajuču koristateljam instalovati aplikacije s uvěrjenostju, že oni ne smogut poškoditi svoju sistemu; ale takože to jest nedostatok, zatože tuto blokuje koristanje Mac App Store dlja profesionalnyh aplikacij, trěbujučih povyšenyh privelegij. Aplikacije bez digitalnogo podpisa ne mogut byti startovane, za izključenjem startovanja iz konta administratora kompjutera.

Apple izpuščaje aplikacije dlja macOS. Něktore iz njih vhodet v sostav macOS, a něktore prodavajut se oddělno. K njim odnoset se iWork, Final Cut Pro, Logic Pro, iLife i aplikacija dlja raboty s bazami danyh FileMaker. Mnogočislne druge razrabotniki takože prědlagajut programno zabezpečenje dlja macOS.

V 2018 godu Apple prědstavila prikladny sloj pod kodovoju nazvoju Marzipan, dlja portovanja iOS-aplikacij na macOS. macOS Mojave vključala porty četyrěh vlastnyh aplikacij iOS, vključajuči Home i News, i bylo oglašeno, že API stane dostupny dlja koristanja postrannymi razrabotnikami od 2019 goda. S izpuščenjem macOS Catalina v 2019 godu prikladny sloj stal dostupny postrannym razrabotnikam pod nazvoju Mac Catalyst.

Aparatna suměstimost

Spis versij macOS, poddrživanyh sistem, i jih trěbovanja k pameti.

Postranne razrabotniki stvorili take instrumenty, kako XPostFacto i patčy dlja butovanyh diskov, da by zabezpečiti instalovanje vyše novyh versij macOS na sistemy, oficialno ne poddrživajeme Apple. K njim odnosi se red sistem Power Macintosh do pokoljenja G3, ktore mogut rabotati pod upravjenjem Mac OS X 10.2 Jaguar vključno, kompjutery Mac na osnově G3, ktore mogut rabotati pod upravjenjem Tiger vključno, a takože kompjutery Mac G4 s čestotoju niže 867 MHz, ktore mogut startovati Leopard, jestli ubrati ograničenje s butovanogo DVD-diska ili vvesti komandu v interfejsu Mac Open Firmware da by soobčiti instalatoru Leopard, že čestota sostavjaje 867 MHz ili vyše. Za izključenjem funkcij, trěbujučih specialnoj aparatury, takyh kako grafično uskorjenje ili zapis DVD, operacijna sistema zabezpečaje jednakovu funkcionalnost na vsej poddrživajemoj aparaturě.

Pokoliko večinstvo aparatnyh komponentov Mac s procesorami Intel, ili komponentov, podobnyh jim, jest dostupno dlja zakupky, něktore tehnične grupy ljudij sut razrabotali programno zabezpečenje dlja instalovanja macOS na ne-Apple kompjutery. Take aparaty nazyvajut se Hackintosh, portmanteau (kombinacija) sloves "hack" (vlom) i "Macintosh". To narušaje EULA s Apple (i take aparaty ne poddrživajut se tehničnoju podporoju Apple, garancijeju i tako dalje), ale spoločnosti obyčnyh koristnikov, ktore ne instalujut macOS dlja prěprodaži i dobytja grošov, sut obyčno ignorovany Apple. Tute samosdělane kompjutery zabezpečajut veliku gybkost i možnost nastavjenja aparatury, ale cěnoju togo, že koristatelj nese veliku odpovědalnost za svoj kompjuter, integritet danyh i jih bezpečnost. Firma Psystar pokušala se dobyti korist od prodaži macOS na aparaturě, ne sertifikovanoj Apple, za čto ju Apple izzvala v sud v 2008 godu.

Prěhod od PowerPC k Intel

V aprilu 2002 goda časopis eWeek izdal ogovarjanje, že u Apple jest versija Mac OS X pod kodovoju nazvoju Marklar, rabotajuča na procesorah Intel x86. Ideja Marklar byla v tom, da by zabezpečiti rabotu Mac OS X na alternativnoj platformě, jestli Apple bude nezadovoljena razvivanjem platformy PowerPC. Te ogovarjanja zamolknuli do konca maja 2005 goda, kogda različne medija, take kako The Wall Street Journal i CNET, oglasili, že Apple prědstavi Marklar v najbližšem měsecu.

6 junija 2005 goda Steve JobsСтив Джобс v svojej rěči na WWDC oglasil, že Apple podčas dvoh lět prějde s procesorov PowerPC na Intel, i že Mac OS X bude poddrživati obědvě platformy podčas tutogo prěhodnogo perioda. JobsДжобс takože potvrdil ogovarjenja o tom, že Apple podčas večšej česti perioda razrabotyvanja koristala versiji Mac OS X, rabotajuče na procesorah Intel. Na Mac'ah na osnově Intel bude rabotati nova prěkompilovana versija OS X zajedno s Rosetta, to jest slojem binarnoj translaciji, ktory dozvaljaje programnomu zabezpečenju, skompilovanomu dlja PowerPC Mac OS X, rabotati na aparatah s Intel Mac OS X. Rosetta byla v sostavu versij Mac OS X do 10.6.8, vključno. Apple odkazala se od poddrživanja klasičnogo režima na novyh Intel Mac'ah. Postranne programy emulacije, take kako Mini vMac, Basilisk II i SheepShaver zabezpečali poddrživanje něktoryh rannjih versij Mac OS. Nova versija Xcode i osnovne kompilatory komandnoj linije poddrživali stvarjenje universalnyh binarnyh fajlov, ktore mogli rabotati na vsakoj arhitekturě.

Programno zabezpečenje, prěznačeno jedino dlja PowerPC, poddrživaje se oficialnym softverom Apple za prěvod binarnyh fajlov Rosetta, ale aplikacije v rezultatu museli byti prěpisanymi, da by oni korektno rabotali na vyše novyh versijah, izpuščenyh dlja procesorov Intel. Prvonačelno Apple pobudžala razrabotnikov stvarjati universalne binarne fajly s poddrživanjem PowerPC i Intel zajedno. Binarne fajly PowerPC stradajut od poniženja produktivnosti pri startu na Intel Mac'ah črěz Rosett'u. Vyše togo, něktoro PZ PowerPC, tako kako nadstavky jedra i plaginy sistemnyh nastavjenij, sovsim ne poddrživajut se na Intel Mac'ah. Plaginy dlja Safari dolžne byti skompilovane dlja toj že platformy, kako i Safari, zatože kogda Safari rabotaje na Intel, jemu sut potrěbne plaginy skompilovane kako binarne fajly jedino dlja Intel, ili universalne binarne fajly, akože plaginy, napisane jedino dlja PowerPC, rabotati ne budut. Ačekoli Intel Mac'y mogut startovati binarne fajly PowerPC, Intel i universalne binarne fajly, PowerPC Mac'y poddrživajut jedino universalne i PowerPC-budovanja.

Poslě prěhoda poddrživanje platformy PowerPC bylo ostavjeno. V 2009 godu Apple oglasila na WWDC, že Mac OS X 10.6 Snow Leopard prěstane poddrživanje procesorov PowerPC i bude rabotati jedino s procesorami Intel. Rosetta prodolžila se prědlagati kako dodatno instalovanje dlja Snow Leopard, prěd tym, kako jej poddrživanje bylo ostavjeno v Mac OS X 10.7 Lion. Vyše togo, nove versije programnogo zabezpečenja Mac OS X, kako vlastnogo stvorjenja, tako i postrannyh razrabotnikov, vse čestěje trěbovali procesorov Intel i novyh versij iLife, iWork, Aperture i Logic Pro.

Prěhod od Intel k Apple silicon

Ogovarjanja o tom, že Apple prěvodi kompjutery Mac s procesorov Intel na vlastne procesory ARM, koristajeme v iOS, počinali hoditi ješče v 2011 godu i to usiljali se, to oslabjali se podčas 2010-h godov. Ogovarjanja usilili se v 2020 godu, kogda mnogočislne soobčjenja ukazyvali na to, že Apple oglasi o prěhodu na vlastne procesory na konferencije WWDC.

22 junja 2020 goda na WWDC Apple oficialno oglasila o prěhodu na procesory vlastnogo razrabotanja, planujuči, že toj prěhod prodli se priblizno dva goda. Prvoju versijeju macOS s poddrživanjem ARM stala macOS Big Sur. Big Sur i vyše pozdnje versije poddrživajut binarne fajly Universal 2, ktore sut aplikacije, sostoječe iz binarnyh fajlov Intel (x86-64) i Apple silicon (AArch64); pri startovanju aplikacije startue jedino podhodeči binarny fajl. Vyše togo, binarne fajly Intel možno startovati na ARM Mac'ah s koristanjem softvera za prěvod binarnyh fajlov Rosetta 2. Prěhod byl dokončeny na WWDC 2023 s anonsovanjem Mac Pro na osnově Apple silicon, s okončanjem prěhoda po 3 lětah, nemnogo so spozdnjenjem od razklada.

Izměnjenje arhitektury procesora dozvaljaje ARM Mac'am startovati aplikacije iOS i iPadOS v nativnom režimu.

Interfejs koristnika

V koristateljskom interfejsu macOS po vrhnemu kraju ekrana razměščaje se linija menju, ktora polěv sodrživaje menju Apple (Apple menu) i menju aplikacij, a poprav sodrživaje menju stanja. Panel Dok (Dock) razměščaje se na dolu ekrana i sodrživaje značky dlja pripetyh i aktivnyh aplikacij, fajlov i papok, skryte okna, i Smetnik (Bin). Na večinstvu okon v početku linije zaglavja sut tri knopky, podobne horizontalnomu semaforu, ktore zatvarjajut, skryvajut i izměnjajut razměr okna.

Apple prodolžaje vnositi izměnjenja v izgled i dizajn macOS, osoblivo v izgled okon i linije menju. S 2012 goda Apple prodaje bliz vse svoje kompjutery Mac s displejami Retina vysokoj rezolucije, a macOS i jej API obširno poddrživajut ne zavisle na rezolucije razrabotanja dlja poddrživanja displejev s vysokoju rezolucijeju. Prěgledniki priměčajut, že poddrživanje tutoj tehnologije so strany Apple prěvažaje jej poddrživanje v Windows.

Mnoge aplikacije slědujut opublikovanomu Apple područniku "Human interface guidelines" dlja macOS, davajuči možlivost sjedinjennogo koristateljskogo interfejsa i kombinacij klaviš. V každoj aplikaciji na osnově frejmvorka Cocoa sut dostupne prověrka orfografije i gramatiky, paleta specialnyh simbolov, izbor kolora, izbor fonta i slovnik. Grafična sistema na osnově OpenGL komponuje okna na ekranu, zabezpečaje aparatno-uskorjeno odrysovanje. Tuta tehnologija, prdstavjena v versije 10.2, nazyvaje se Quartz Extreme, ona jest komponentom grafičnogo sloja Quartz. Vnutrny model obrabotanja izobraženja Quartz jest těsno svezany s modelom izobraženja formata Portable Document Format (PDF), čto ulegšaje izvodženje PDF na raznyh aparatah. Blagodare tomu funkcije prěgleda i stvorjenja PDF-dokumentov sut vbudovane vo vse standartne aplikacije. Soglasno svojej popularnosti srěd dizajnerov, macOS takože dobyla poddrživanje množstva profesionalnyh video- i grafičnyh formatov i obširnu biblioteku prědustavjenyh fontov so znajemymi firmenymi dizajnami.

Aqua

Jednym iz glavnyh dodatkov medžu klasičnoju Mac OS i prvym osnovnym izpuščenjem Mac OS X byl dizajn Aqua s podobnymi vodě elementami. On byl razrabotany tako, "da by jego se požedalo liznuti". Každy okonny element, tekst, grafika, vidžet renderovali s koristanjem tehnologije prostranstvenogo zagladžanja. Prědhodno egzistujča tehnologija ColorSync byla ulěpšena i sbudovana v osnovny grafičny motor, da by zabezpečiti sovpadenje kolorov dlja professionalov v oblasti pečatarstva i multimedia. Vokrug okon i oddělnyh tekstovyh elementov byli dodane tenje dlja stvorjenja počutja glubiny. Byli integrovane nove elementy interfejsa, vključajuči izdvižne okna (dialogove okna, pripinane k konkretnym oknam) i izdvižne panely, ktore mogli izdvigati se i zabezpečati dodatne možnosti.

Koristanje mekkyh obrysov, poluprozračnyh kolorov i tenkyh linij, podobno dizajnu prvyh iMac, dodalo vyše tekstury i kolora v koristateljsky interfejs v sravnjenju s tym, čto sut prědkladali Mac OS 9 i Mac OS X Server 1.0 v izgledu Platinum. Po slovesam Sirakuzy, pojavjenje Aqua i jej odhod od onogdašnjego izgleda byli "kako grom srěd jasnogo nebesa".Bruce TognazziniБрјус Тоњацини (osnovatelj originalnoj Apple Human Interface Group) skazal, že interfejs Aqua v Mac OS X 10.0 byl krokom nazad v planu komforta koristanja po sravnjenju s originalnym interfejsom Mac OS. Postranne razrabotniki počeli tvoriti temy izgleda dlja nastavjanyh aplikacij i inyh operacijnyh sistem, ktore imitovali izgled Aqua. V něktoroj měrě Apple izkoristala uspěšny prěhod k tutomu dizajnu dlja pritiska i grozby sudnymi težbami protiv tyh, kto tvori ili razprostranjaje programno zabezpečenje s ihterfejsom, ktory, po tvrdženju firmy, jest osnovany na jej ohranjenom avtorskym pravom dizajnu.

Vslěd podobnogo izměnjenja dizajna v iOS 7, OS X Yosemite prěšli k ploskomu dizajnu, uprostivši mnoge elementy i ikonky Aqua. V 2025 godu macOS Tahoe prijela dizajn Liquid Glass, čestično nadohnuty Aqua.

Prědustavjene komponenty

Finder jest fajlovy menedžer, zabezpečajuči bystry dostup ko vsim oblastam kompjutera, ktory byl ulěpšeny v daljsih versijah macOS. Funkcija Quick Look jest v Finder'u počinajuči s versije 10.5. Ona dozvaljaje dinamično prěgledati fajly, vključajuči videa i mnogostranične dokumenty, bez startovanja kakyh-libo drugyh aplikacij. Spotlight, tehnologija poiska fajlov, integrovana v Finder počinajuči s versije 10.4, dozvaljaje bystro v realnom času iskati fajly danyh, poštne poslanja, fotografije i drugu informaciju na osnově svojstv elementov (metadanyh) ili sodržanja.

V versiji 10.3 Apple dodala funkciju Exposé (s versije 10.7 ona nazyvaje se Mission Control), ktora imaje tri možnosti dlja ulěpšenja dostupnosti medžu oknami i rabočim stolom. Tute možnosti vključajut bystro odobraženje vsih aktivnyh okon kako miniatury dlja koristnoj navigacije k raznym zadanjam, odobraženje vsih aktivnyh okon kako miniatury iz tekučej aplikacije i skryvanje vsih okon dlja dostupa k rabočemu stolu. FileVault jest dodatna funkcija šifrovanja fajlov koristatelja s pomočju 128-bitnogo razširjenogo standarda šifrovanja (AES-128).

V versiji 10.4 byli prědstavjene take funkcije: Automator, aplikacija, potrěbna dlja stvarjenja avtomatizovanyh rabočih procesov dlja raznyh zadanij; Dashboard, grupa malyh aplikacij na cěly ekran, nazyvajemyh vidžetami rabočego stola, ktore možno otvarjati i zatvarjati jednim pritiskanjem klaviši i Front Row, interfejs pogleda multimedia, dostupny s pomočju Apple Remote. Služby sinhronizacije Sync Services dozvaljajut aplikacijam dostavati dostup k centralizovanoj razširjajemoj bazě danyh dlja raznyh elementov koristateljskyh danyh, vključajuči elementy kalendara i kontaktov. Potom operacijna sistema kontroluje konfliktujučimi izměnjenjami i zabezpečaje konsistentnost danyh.

Počinajuči s versije 10.5 vsi sistemne ikonky povyšajut se do 512×512 pikselov, da by podhoditi raznym městam, kde one odobražajut se v večem razměru, vključajuči, napriklad, vid Cover Flow, - triměrny grafičny koristateljsky interfejs s iTunes, Finder, i drugymi produktami Apple, dozvaljajučimi vizualno pogledati fajly i digitalne mediateky po obložkam. V tutoj versije takože byli prědstavjene Spaces, virtualne pracovne plošiny, dozvaljajuče koristatelju imati nekoliko desktopov i odobražati jih v interfejsu, podobnomu Exposé; tehnologija avtomatičnogo rezervnogo kopijovanja Time Machine, dozvaljajuča koristateljam progledati i vozvračati prědhodne versije fajlov i dane aplikacij; i vprvo byla prědustavjena funkcija sděljenogo ekrana Screen Sharing.

Apple dodala poddrživanje simbolov emodzi, vključivši v macOS proprietarny font Apple Color Emoji. Takože Apple svezala macOS s socialnymi mrežami, takymi kako Twitter i Facebook, dodavši knopky dlja obměna kontentom, fotkami i tekstom. Apple prěnesla v macOS nekoliko aplikacij i funkcij, ktore vprvo pojavili se v iOS, jej mobilnoj operacijnoj sistemy, napriklad, intelektualnogo osobnogo pomočnika Siri, prědstavjenogo v versiji 10.12 macOS.

Mnogojezyčno poddrživanje

Pri instalovanju macOS koristatelju sut dostupne 47 jezykov sistemy. Metody vvoda dlja desetkov pisemnostij možno izbrati nezaležno od sistemnogo jezyka. Obnovjenja dodali razširjeno poddrživanje kitajskogo pisma i integraciju s popularnymi socialnymi mrežami v Kitaju.

Metody obnovjenja

Obnovjenje macOS možno izpolniti s pomočju panela nastavjenij "Obnovjenje programnogo zabezpečenja" (Software Update) v sistemnyh nastavjenjah ili utility komandnogo redka softwareupdate. Do OS X 10.8 Mountain Lion, tuta funkcija izpolnjala se oddělnoju aplikacijeju "Obnovjenje PZ" (Software Update). V Mountain Lion i vyše pozdnyh versijah tuta funkcija byla integrovana v aplikaciju Mac App Store, ale osnovny mehanizm obnovjenja ostal neizměnnym i silno odličaje se od mehanizma daunlodovanja, koristajemogo pri pokupkě aplikacij v App Store. V macOS 10.14 Mojave funkcija obnovjenja iznova byla prěměščena v panel nastavjenij "Obnovjenje PZ".

Večinstvo kompjuterov Mac dostavajut obnovjenja macOS podčas šesti ili sedmi lět. Poslě izhoda novogo osnovnogo izpuščenja macOS prědhodne dva izpuščenja, kako prědže, periodično obnovjajut se, ale mnoge "diry" v bezpečnosti likvidujut se jedino v poslědnjem izpuščenju macOS.

Apple publikuje dokumenty Apple Platform Security, da by izložiti mehanizmy zaščity, vbudovane v sistemu macOS i aparaturu Mac.

Na kompjuterah Mac s Apple silicon, macOS poddrživaje dodatočne aparatne elementy bezpečnosti:

• Write xor execute (W^X) odvračaje něktore bezpečnostne ranimosti, dělajuči stranicy pameti ili zapisyvajemymi, ili izpolnjajemymi, ale ne obojimi razom.
• Devajsy s PCIe ili Thunderbolt sut s pomočju IOMMU odvračene od sčityvanja sistemnoj pameti, ktora ne jest jevno k njim mapovana, na razliku od kompjuterov Mac na bazě Intel.

Opcijonalny v macOS režim Lockdown Mode dělaje možlivoju dodadotčnu zaščitu, kako napriklad neumožnjenje kompilacije realnogo časa dlja mašiny JavaScript v Safari, blokovanje telefonovanij FaceTime, jestli raněje vy s tutym kontaktom ne telefonovali, informacija o lokacije odstranjaje se, kogda fotografije se posylajut, Game Center izključen, prinaležnosti muset byti odobrjene, a vaš Mac odblokovany. Tuto prěodvračaje něktore čutlivosti macOS.

Toliko poslědne velike izpuščanja macOS (aktualno je macOS Tahoe) sut dostali zaplaty na vse bezpečnostne čutlivosti. Dva prědhodnyh izpuščenja dostavajut něktore bezpečnostne obnovjenja, no ne dlja vsih ranimostij, o ktoryh znajut v Apple. V 2021 godu Apple izpravila kritičnuju ranimost eskalacije privilegij v macOS Big Sur, ale tuto izpravjenje ostalo nedostupnym dlja prědhodnogo izpuščenja, macOS Catalina, podčas 234 dnjev, dokud Apple ne dostala informaciju, že tuta ranimost byla izkoristana za infikovanje kompjuterov obyvateljev Honkonga i ostatnih ljudij, ktore posečali antivladne sajty, ktore mogli byti zablokovane v Honkongu.

V macOS Ventura pridali podporu obnovjenij Rapid Security Response (RSR) režima Lockdown. Obnovjenja Rapid Security Response mogut potrěbovati restartovanja, ale instalujut se za menje, než minutu. V analitikě, razrabotnik Hackintosh Mykola GrymalyukМыкола Грамалјук primětil, že obnovjenja RSR mogut izpravjati toliko ranimosti prostora koristnika, ale ne mogut izpravjati jedro macOS. Lockdown Mode jest opcionalna bezpečnostna črta, izrabotana za zabezpečanje ekstremalnoj zaščity dlja koristateljev, ktore mogut byti podvrgnute riziku cěljenyh kiberatak, kako sut žurnalisti, aktivisti i publične figury. Tuty režim značno izměnjaje funkcionalnost devajsa, povyšajuči jego bezpečnost protiv rafinovanyh grozb, imenno protiv špionskyh program i napadov, organizovanyh državnymi organami. Apple utvrdžaje, že večšinstvo ljudij jest nikogda vyše podvrženo tutym atakam.

Zlovrědne i špionske programy

V svojih rannyh lětah, Mac OS X iměla radost blizko polnoj odsutnosti svojih tipov zlovrědnyh i špionskyh program, ktore oplyvnjali koristateljev Microsoft Windows. macOS imaje nizšy děl koristnikov v sravnjenju s Windows. Črvjaki, a takože potencialne ranimosti byli priměčane v 2006 godu, čto vedlo něktoryh analitikov industrije i antivirusne kompanije izdati ostrěženje, že Apple Mac OS X ne jest vpolno imunna protiv zlovrědnogo softvera. Povyšanje tržnogo děla sběgalo se s rastučimi soobčenjami o raznorodnyh atakah. Na početku 2011 goda, Mac OS X soočila se s velikym rastom atak zlovrědnyh program, i take zlovrědne programy, kako Mac Defender, MacProtector, i MacGuard razgledali se kako rastuča problema dla koristnikov kompjuterov Mac. Na početku, instalator zlovrědnogo softvera trěboval od koristnika zadavati parolu administratora, ale pozdějše versije se instalovali bez vvoda od koristnika. Prvonačelno, personal poddržky Apple byl poučen ne pomagati odstranjovati zlovrědne programy i ne priznavati egzistovanje problemy zlovrědnyh program, ale s razprostranjenjem virusov byl ipuščen dokument dlja poddržky. Apple oglasila obnovjenje OS X, ktoro izpravi problemu. Tuto dotykalo se priblizno 100,000 koristnikov. Apple regularno izdavaje obnovjenja bezpečnosti dlja macOS, ravno kako fajly podpisa, ktore sodrživajut signatury zlovrědnyh program dlja Xprotect, antivirusnoj česti paketa File Quarantine, prisutnogo počinajuči s Mac OS X Snow Leopard.

Děl koristnikov

Podlě danyh januara 2023 goda, macOS jest vtora najširoko koristana sistema občego naměrjenja, izkoristana v Internetu, vslěd Microsoft Windows, s dělom koristateljev 15.33% suglasno statistikě, sobranoj StatCounter.

Promocija

Kako proizvoditelj aparatov, Apple najvyše promovala macOS, da by prodavati kompjutery Mac. S promovanjem obnovjenij macOS fokus byl na jestvujučih koristnikah, promocije Apple Store i partnerskyh magazinov, ili na sobytjah dlja razrabotnikov. V velikorazměrnyh reklamnyh kampanijah, Apple osoblivo promovala macOS kako lěpšu za rabotu s media i v drugyh priměnjenjah u domašnogo koristatelja, i v sravnjenju s Mac OS X (osoblivo versij Tiger i Leopard), firma Microsoft dostala mnogo kritiky za svoju dolgo očekyvanu operacijnu sistemu Windows Vista.

• Tutoj članok imaje prěvod iz članka «macOS» v Vikipediji na anglijskom (spis avtorov; dozvoljen‌je CC BY-SA 4.0).