Atau nya siti ari indu perengka metabolik ti eksklusif ditemu ba vertebrata, ti bejalaika mayuh fungsi biologi pugu ti beguna baka detoksifikasyen organisma, enggau sintesis mayuh bengkah protein enggau mayuh bengkah biokimia bukai ti beguna dikena penganchur pemakai enggau penumbuh. Dalam mensia, iya beduduk ba kuadran atas kanan perut, ba baruh diaphragm lalu tebal agi diterabai tulang kerigai kanan baruh. Tanggungpengawa metabolik iya ke bukai nyengkaum metabolisme karbohidrat, ngasilka mayuh bengkah hormon, mali enggau naruh nutrien baka glukos enggau glikogen, sereta ngerepuk sel darah mansau. Terminologi anatomi enggau perubat suah ngena penambah hepat- ari ἡπατο-, ari leka jaku Gerika ke mai reti atau, baka hepatologi, enggau hepatitis.
Atau mega nyadi perengka penganchur aksesori ti ngasilka empedu, ai alkali ti ngundan kolestrol enggau asid empedu, ti ngaga emulsi sereta mantu mambarka lanyih pemakai. Tekang empedu, kandi mit ti belubang ti duduk ba baruh lobus kanan atau, naruh sereta ngemeratka empedu ti diasilka atau, ti udah nya dipansutka ngagai duodenum kena nulung pengawa nganchur pemakai. Tisu atau ti amat spesialis, ti ngundan tebal agi hepatosit, ngatur mayuh bengkah timbal biokimia bevolume tinggi, nyengkaum sintesis enggau pemambar molekul organik ti mit sereta kompleks, mayuh ari nya beguna ke fungsi vital ti normal. Anggar bekaul enggau penyampau semua fungsi perengka nya bebida, tang sechara rama disebut urung 500. Ketegal tu, atau kekadang dikumbai kilang kimia tubuh.
Bedau ditemu baka ni deka nangkup penadai fungsi atau dalam timpuh ke panjai, taja pan teknik dialisis atau ulih dikena dalam timpuh ke pandak. Atau tiru lalu bedau dikemansang dikena ngelakuka pengawa nganti timpuh-panjai enti nadai atau. Sekumbang taun 2018, semina pemindah atau jalai ngubat atau rusak magang.