Barack Obama

Barack Hussein Obama II [bəˈrɑːk huːˈseɪn oʊˈbɑːmə], tuvu nacencia el 4 d'agostu de 1961 en Honolulu (Hawaii). Biembru'l Partiu Demócrata i senaol "junior" por Illinois dendi el 3 d'eneru de 2005 hata'l 16 de noviembri de 2008, hue presienti eletu delos Estaus Unius endispués de bel ganau las elecionis presiencialis aviás el 4 de noviembri de 2008. Barack Obama acupó oficialmenti el su cargu comu 44º Presienti los Estaus Uñius el 20 d'eneru de 2009. Essi mesmu añu se le atorgó el Premiu Nobel dela Pas.

Obama hue el primel afro-americanu en sel ligiu presienti delos Estaus Uníus, i tamién hue el primel en estal nominau candiatu a esti cargu por unu delos grandis partíus politicus desti país. Graduau pola Nuversiá de Columbia i la Escuela de Derechu de Harvard, ondi amás hue presienti dela Harvard Law Review, espublicación a tentu de leis dela nuversiá. Obama trebajó comu olganiçaol comunitario i comu avogau en derechu cevil enantis de sel ligiu comu senaol por Illinois entri 1997 i 2004. Hue profissol de Derechu costitucional ena Escuela de Derechu de la Nuversiá de Chicago entri los añus 1992 i 2004. Endispues de no conseguil un puestu ena Camara de Representantis delos Estaus Uníus nel añu 2000, escomençó una campaña pa sel senaol n'eneru 2003. Hue ligiu al fin comu senaol en noviembri 2004 cun 70% de los votus.

Obama anunció la su campaña palas elecionis generalis en hebreru 2007, i hue nombrau oficialmenti ena Convencion Democrata de 2008. Concurrió alas elecionis con Joe Biden comu candilatu a vicipresienti. Los candilatus el Partíu Republicanu apresentarun a John McCain (pa Presienti) i Sarah Palin (pa vicipresienta).