Prifddinas Gweriniaeth Ymreolaethol Tsietsnia yn Rwsia yw Grozny (Rwseg: Гро́зный; Tsietsieg: Соьлжа-ГIала, Sölža-Ġala), weithiau hefyd Джовхар-ГIала (Džovxar-Ġala)). Saif ar afon Soenzja, afon sy'n llifo i mewn i afon Terek. Roedd y boblogaeth yn 2002 yn 210,720, gostyngiad sylweddol o gyfnod yr Undeb Sofietaidd, pan gyrhaeddodd y boblogaeth 399,600.
Wedi diwedd yr Undeb Sofietaidd, daeth Grozny yn brifddinas gweriniaeth annibynnol de facto "Gweriniaeth Tsietsien Itskeria yn 1991. Bu ymladd ffyrnig yma yn ystod Rhyfel Cyntaf Tsietsnia rhwng Rhagfyr 1994 a Chwefror 1995, a lladdwyd 20,000 hyd 25,000 o'r trigolion. Bu ymladd yma eto yn ystod Ail Ryfel Tsietsnia yn 1999-2000, a lladdwyd nifer fawr o'r trigolion eto. Meddiannwyd y ddinas gan y Rwsiaid.
