Vanilla Ice (Dallas, Texas; 31 d'ochobre de 1967), que'l so verdaderu nome ye Robert Matthew Van Winkle, ye un cantante de rap, baillarín y actor d'Estaos Xuníos, principalmente conocíu pol cantar «Ice Ice Baby». Vendió más de 20 millones de discos a nivel mundial.
Historia
Primer etapa
Tuvo como representante a Jay King, gracies a quien llogró llanzar el so primer álbum Hooked (1989). Vendió alredor de 48 000 copies, convirtiéndose nuna rareza y n'oxetu de coleición polos sos siguidores.
Afitamientu
El so siguiente álbum, To the Extreme (1990), contenía casi los mesmos cantares de Hooked. Esti álbum contenía'l senciellu «Ice, Ice Baby», un rap alrodiu de les sos habilidaes como MC, la vida de Miami y un tirotéu na A1A/Beachfront Avedisco. Más tarde publicó Extremely Live (1991), grabación d'una presentación en conciertu que vendió 500 000 copies, incluyendo una versión rap de la tema «Satisfaction» de los Rolling Stones. Esi mesmu añu participó na película Les Tortúes Ninja II, formando parte de la banda sonora col cantar «Ninja Rap», y protagonizó la película Cool as Ice, onde interpreta a Johnny.
En 1992 Madonna publicó'l so polémicu llibru eróticu Sex, onde Vanilla Ice participó como modelu. Nuna de les imáxenes, Madonna muerde un piercing que Vanilla lleva nun tetu.
Pasada esta dómina, empezó un descensu na so popularidá causáu por múltiples factores, como'l final del soníu new jack swing, la entrada del grunge y el fechu de que la so actitú yera considerada un pocu falsa. Remaneció ensin ésitu con Mind Blowin (1994), nel que camuda un tanto el so estilu de lletres y música.
En 1997 casóse con Laura Giarritta, con quien tien dos neños: Dusti Rain (1998) y KeeLee Breeze (2000). En 1998 grabó Hard to Swallow, onde entemez el hip-hop col heavy metal, qu'inclúi una nueva versión de «Ice Ice Baby» llamada «Too Cold». Mientres una presentación promocional en Alabama llanzó copies del senciellu al públicu, que respondió llanzándo-yles de regresu.
En 1999 tenía d'apaecer nun especial de MTV onde dellos invitaos criticaben y facíen risión diversos videos. Unu d'ellos sería «Ice Ice Baby». Depués Vanilla Ice apaecería nel show pa destruyir un single so con un bate de béisbol. Vanilla Ice pensó que'l so videu foi un verdaderu hit y que realmente-y gustaba enforma, polo que destruyó'l set como símbolu de que lo que verdaderamente tien de sumir ye la crítica destructiva que recibía.
En 2001 llanzó l'álbum Bipolar, siguiendo cola llinia metalera, y en 2003 salió al mercáu la escoyeta Hot Sex. El más recién álbum d'estudiu ye Platinum Underground (amiestu de rap, nu-metal y hip hop), que nun tuvo gran ésitu.
En 2012 participó na película That's My Boy protagonizada por Adam Sandler, y en 2015 apaeció como personaxe secundariu nel filme Ridículos 6.
El cantar «Ice Ice Baby» (1990) foi denunciada por plaxu del famosu cantar de Queen y David Bowie «Under Pressure», y anque nun principiu Vanilla negar a reconocelo, llueu nun tuvo más remediu que llegar a un alcuerdu estraxudicial pa nun dir a xuiciu, por cuenta de lo evidente del casu.
Nun llogró repitir el gran ésitu llográu con «Ice Ice Baby» ya intentó apocayá llograr meyor suerte presentando un programa en televisión.
En febreru de 2015 foi acusáu de robar dellos artículos ente avientu y febreru d'una propiedá abandonada que taba xunto a una residencia qu'él s'atopaba anovando. Ente los oxetos que lu atoparon a Van Winkle taben un calentador d'agua de piscina y dellos muebles. Los bienes fueron restituyíos pola policía al so llexítimu dueñu. Dempués d'un día so custodia, Vanilla Ice foi puestu en llibertá y dixo ante les cámares de televisión que cubrieron l'incidente que tou fuera un tracamundiu y que'l so casu tomó proporciones risibles. «Ye murniu que les bones noticies nun cuerran tan rápido», amestó.
Discografía
- Álbumes
- Hooked (1988)
- To the Extreme (1990)
- Extremely Live (1991)
- Cool as ice (1992)
- Mind Blowin (1993)
- Hard to Swallow (1997)
- The Best of Vanilla Ice (1999) (discu de platín)
- Bi-Polar (2001)
- The Best of Vanilla Ice (2001)
- Hot Sex (2003)
- Platinum Underground (2005)
- The Best of Vanilla Ice (2006)
- Invoking Crazy Horse - Ice Vanilla Remixes (2006) (LP en vinilu; edición llindada pa coleicionistes)
- Vanilla Ice is Back (2008)
- W.T.F. (Wisdom, Tenacity and Focus) (2010)
Filmografía
- Tortúes Ninja II: El secretu del Ooze (1991)
- Cool as Ice (1991)
- The New Guy (2002)
- That's My Boy (2012)
- Ridículos 6 (2015) (Netflix)
Enllaces esternos
- Wikimedia Commons acueye conteníu multimedia sobre Vanilla Ice.
- Vanilla Ice na Internet Movie Database (n'inglés)
- Discografía de Vanilla Ice en Discogs
