العدرا مريم، فى المسيحيه، ام يسوع بنت يواقيم و امها هى السيدة حنة. اعظم القديسات عند المسيحيين اللى بيلقبوها بـ”ستنا“ و ”ام الرب“. بشرها الملاك جبرائيل بحملها المخلص يسوع الرب له المجد. كانت مخطوبة ليوسف النجار و كانت بنت عم اليصابات ام يوحنا المعمدان. شافت صلب ابنها بعد ما شاركت فى خدمته. المسيحيين قدسوها دايم على مر التاريخ و اتحكت عنها حكايات كتيره و بتكرمها الكنايس الكاتوليكيه و الارتودوكسيه اعظم تكريم لكن ماهياش موضوع عباده. الارتودوكس و الكاتوليك بيختلفو فى المبالغه فى تقديسها زى الاعتقاد فى ولادتها من غير دنس و بإنها فضلت عدرا طول حياتها، و ان اللى اتسمو اخوات يسوع فى الانجيل كانو ولاد خال و ان جسمها اترفع للسما بعد وفاتها.
كنايس كتيره فى العالم متسميه على اسم العدرا، و ليها تماجيد خاصه بيتذكر فيها اسمها لتعظيمها، و ليها مزارات مشهوره بيحج ليها الحجاج المسيحيين لإن بيتقال انها ظهرت فيها و اهمها فى لوردس فى فرنسا (للقديسه بيرناديت)، و فاتيما فى پورتوجال، و فى كنيسة الزتون فى مصر اللى بيتقال انها اتجلت فيها سنة 1967. للعدرا مكانه كبيره فى مصر عند المسيحيين و المسلمين.
