لكرواتية (ب لكرواتية: hrvatski) هي لڤيرسيون لمعيارية ديال الصربية لكرواتية، لي كيستعملوها لكروات. هاد اللوغة هي الرسمية و لمعيارية ف كرواتيا، و وحدة من تلاتة اللوغات الرسمية ف لبوصنة و لهرسك، و حتى وحدة من اللوغات الرسمية ف مونطينيڭرو، و ف لإقليم د ڤويڤودينا ف صربيا، و ف ليتيحاد لؤروپي. لكرواتية معترف بيها كـ لوغة أقلية حتى ف بعض لمناطق لخرة ف صربيا و ف شي دول جيران.
ف وسط لقرن 18، بداو لمحاولات اللولة باش يتدار معيار أدابي للكرواتية، و داكشي كان مبني على اللهجة الشطوكاڤية الجديدة لي كانت كتلعب دور ديال لوغة موحدة فوق جهوية، و بدات كتحيّد لهجات بحال الشاكاڤية، الكايكاڤية، و الشطوكاڤية.
الدور لحاسم لعبوه لكروات ديال تيار ڤوكوڤي (حاراكة ديال ليسانيين لي حاولات تطور كرواتية معيارية)، لي رسّخو تخدام الشطوكاڤية الجديدة ب لإيجكاڤية كـ معيار أدابي ف التواخر ديال لقرن 19 و بدية لقرن 20، و صايبو حتى كتابة صوتية مبنية على النطق.
لكرواتية كاتكتب دابا ب أبجدية ڭاي اللاتينية.
بـ جنب الشطوكاڤية لي مبنيّة عليها لكرواتية لمعيارية، كاينين جوج د الصياغ لعاليين خرين كيتهضرو ف كرواتيا، هوما الشاكاڤية و الكايكاڤية.
هاد الصياغ، مع الربعة ديال لمعايير لوطنية — لبوصنية، لكرواتية، لمونطينيڭرية، و الصربية — كيتجمعو ف لعادة تحت سمية وحدة ف النڭليزية: Serbo-croatian "الصربية لكرواتية". هاد لمصطلح فيه الجدل عند لمتكلمين لأصليين، و ف لقرن 21، الليسانيين و لفيلولوجيين بداو كيتستعملو تسميات بحال "لبوصنية لكرواتية لمونطينيڭرية الصربية" BCMS.
ف 1997، لبرلمان لكرواتي قرّر يدير "أيام لكرواتية" من 11 حتى لـ17 مارس.
و من 2013، لمعهد ديال للغة لكرواتية ولى كايحتافل بـ "شهر لكرواتية"، لي كيمتد من 21 فبراير (لي هو ليوم لعالمي د اللوغة لأم) حتى لـ17 مارس، لي هو نهار توقيع لإعلان على السمية و لوضعية ديال اللوغة لكرواتية لأدابية.
