O telefono ye un instrumento de telecomunicación disenyato ta transmitir sinyals acusticos (ye decir sonius, por un regular, a voz) entre dos u mas puestos por meyo de sinyals electricos.
Hue ye uno d'os trastes mas comuns y se troba en cuasi todas as casas. Os telefonos funcionan transmitindo sinyals eletricos por rez telefonicos complexos que permiten que un usuario de telefono pueda comunicar-se con cuasi cualsiquier otro. Antes mas istos sinyals viachaban unicament por cables (telefonos fixos), mientres que dende fa bellas anyadas, tamién se transmiten por ondas hertzianas (telefonos móbils u portátils). Tamién bi ha telefonos que permiten transmitir imáchens (vidiotelefonos).
Historia
Por muito tiempo, Alexander Graham Bell fue considerato l'inventor d'o telefono. Sindembargo, Bell no estió o inventor d'iste traste, fue nomás o primer en patentar-lo. Asinas, l'11 de chunio de 2002, o Congreso d'os Estaus Unius homologó a resolución 269, por a que se reconoixeba que l'inventor d'o telefono heba estato Antonio Meucci, que lo clamó teletrofono, y no Alexander Graham Bell. Meucci, por dificultaz economicas, nomás podió presentar, en 1871, una breu descripción d'o suyo invento, pero no formalizó a patent debant d'a Oficina de patents d'os Estaus Unius.
