Breaking Bad

Breaking Bad (dütsch öbbe „Chrach mache“) isch en amerikanischi Färnseeserii vom Vince Gilligan. Si zäigt, wie e biidere Chemiileerer, wo Lungechräbs het, zum ene rücksichtslose Kriminelle wird. D Hauptrolle vom Chemiileerer Walter White spiilt dr Bryan Cranston, wo für sis Spiil drei Emmys as beste Hauptdaarsteller überchoo het. D Serii isch dur Drama-Elemänt und schwarzem Humor brägt. Broduziert worde isch si vo High Bridge und Gran Via Productions zämme mit Sony Pictures Television, ere Dochdergsellschaft vo dr Sony Pictures Entertainment Company, für e Kabelsänder AMC. Si bestoot us 62 Episode in fümf Staffle und isch zum erste Mol in de USA vom 20. Januar 2008 bis zum 29. Septämber 2013 gsändet worde.