Brachiosaurus of bragiosourus was ’n genus Sauropoda-dinosourusse uit die Laat Jura-periode in Noord-Amerika. Dit is die eerste keer in 1903 beskryf na aanleiding van fossiele wat in Colorado, VSA, ontdek is. Die brachiosourus was groot, met ’n lang nek en klein skedel – alles tipiese eienskappe van Sauropoda. In teenstelling met ander genera, was die brachiosourus se voorpote egter langer as sy agterpote, en al was die stert lank, was dit steeds kort vir Sauropoda.
Brachiosaurus is uit die familie Brachiosauridae, wat ’n paar ander, soortgelyke dinosourusse insluit. Baie van dit wat gewone mense van Brachiosaurus weet, het eintlik betrekking op Giraffatitan brancai, ’n spesie uit Tanzanië wat oorspronklik geklassifiseer is ’n lid van Brachiosaurus. Onlangse navorsing het egter gewys die verskille tussen die voorbeelde uit Afrika en die tipe-spesie van Brachiosaurus is groot genoeg dat eersgenoemde ’n aparte genus vorm.
Anders as ander lede van Sauropoda, en ondanks sy uitbeelding in die rolprentreeks Jurassic Park, kon hy nie op sy agterpote staan nie.
Galery
