遊戲物理

阅读约1分钟
6种语言

遊戲物理，粵音：jau4 hei3 mat6 lei5，係指遊戲程式用某啲法則嚟模擬現實世界嘅物理：除咗互動式小說等極少數嘅類型之外，電子遊戲幾乎實會有某啲型式嘅虛擬空間，畀玩家控制某啲角色喺入面郁動，所以遊戲嘅世界多數都或多或少要有啲法則主宰物件應該點郁，而更新遊戲世界狀態嘅過程當中，遊戲程式要按遊戲嘅物理法則同埋玩家輸入，計算出個世界嘅狀態應該要點變。

例如有隻賽車遊戲，用近似牛頓力學噉嘅法則嚟處理啲車輛嘅郁動，玩家撳咗踩油嘅掣嗰陣，遊戲程式就要改變玩家控制緊嗰架車嘅加速度嘅值，而架車相應嘅速度同位置等變數，亦要跟牛頓力學裏面嘅法則作出相應嘅改變。

力學模擬

例如以下呢段用 C 程式語言寫嘅源碼，可以用嚟模擬喺牛頓第二定律下郁動嘅物體：

double t = 0.0;
float dt = 1.0f;

float velocity = 0.0f;
float position = 0.0f;
float force = 10.0f;
float mass = 1.0f;
// 設一大拃變數，包括咗時間點 t、時間間隔 dt、速度 velocity、位置 position、件物體受嘅力 force、同件物體嘅質量 mass。

while ( t <= 10.0 ) // 重複噉計若干次，計到時間點係 10 為止。
{
    position = position + velocity * dt;
    velocity = velocity + ( force / mass ) * dt; // 用牛頓第二定律計吓件物體受嘅力同佢嘅質量會點影響佢嘅速度。
    t += dt;
}

碰撞探測

碰撞探測係一類演算法，用嚟探測個虛擬世界內部有冇邊對物件相撞。

碰撞探測要點樣最佳化，係一條大問題：最直接嘅做法，段演算法可以將所有物體可能配對遂對遂對攞嚟睇，但噉做嘅運算複雜度會好高—較有效率嘅做法，可能係將遊戲空間入面啲物件全部睇做長方體，排除邊對邊對物體冇可能係相撞緊噉。

碰撞探測嘅概念：

命中框，hitbox：遊戲空間入便對應某個角色或者某件物件嘅空間，如果有子彈同某件物件嘅命中框碰撞，遊戲程式就會當呢一粒子彈打中咗嗰件物件；喺玩家對打嘅射擊遊戲中，體型較大嘅角色，命中框會大啲，令佢哋比較容易畀敵人打中，但同時佢哋血量又好多時會高啲，所以比較能夠承受攻擊。
傷害框，hurtbox：指某個攻擊，例如以子彈等嘅物件代表，嘅命中框，一下攻擊嘅傷害框要同目標嘅命中框碰撞，先可以對個目標造成傷害。