Barein

An Barein o kundi man Bahrain (Inarabo: البحرين‎ al-Baḥrayn Inarabo nga pagluwás:  ( pamati-a)), nga an opisyal nga ngaran Ginhadi-an han Barein (puyde liwat Ginhadi-an han Bahrain Inarabo: مملكة البحرين‎ Mamlakat al-Baḥrayn), usá nga nasod nga purô ha Gulfo han Persia. Nahihimo an soberano nga estado hin guti-ay nga kapurupod-an nga nahabutnga palibot han Purô han Barein, nga nahamutang ha butnga han rawis han Qatar ngan han dumagsaan nga labnasan han Saudi Arabia, nga diin nahasumpay iní han 25 ka kilometro (16 ka milyas) nga Kalsada ni Hadi Fahd. An kamolupyohan han Barein mga 1,234,561 (c. 2010), upod in 666,172 nga mga diri-nasyonal. An Barein, 780 nga kwadrado nga kilometro (300 nga kwadrado nga milyas) hin kadako, nga naghihimo iní nga ikatulo-nga-gigutiayi nga nasod ha Asya sunod han Maldivas ngan Singgapura. An syudad han Manama amo an pamunuan ngan gidakoi nga syudad.

An Barein amo an sityo han kahadto nga sibilisasyon han Dilmun. Kilalado iní tikang han kahadto tungod han mga panagatan hin mutya o perlas, nga ginkikita nga amo an gimaupayi han kalibotan kutob han ika-19 nga gatostuig. An Barein amo an mga sarusayo nga mga lugar nga nagkarawat han Islam, han 628 AD. Sunod hin panahón hin Arabo nga pagdumara, ginpamunuan an Bahrain han Imperyo Portuges tikang 1521 kutob han 1602, nga diin ginsakop iní ni Shah Abbas I han dinastiya Safavid ha ilarom han Imperyo Persa. Han 1783, an katulinan han Bani Utbah nagsakop han Bahrain tikang kan Nasr Al-Madhkur ngan tikang hiní nga panahon, ginpamunuan iní han Al Khalifa nga hadianon nga panimalay, nga diin hi Ahmed al Fateh am an syahan nga hakim han Barein.

Han mga urhe nga bahin han gatostuig han mga 1800s, pagsunod hin mga sunodsunod nga mga kasabotan upod han mga Britaniko, nagin protektorado an Barein han Reino Unido. Han 1971, nagdeklara hin paglugaríng an Barein. Kasanhi anay ini nga emirato, han 2002 gindeklara iní nga Islamiko nga monarkiya nga konstitusyonal.

Han 2011, nakatagamtam an nasod hin mga protesta nga na-inspirar han Arab Spring han rehiyon. An naghahadi nga hadianon nga panimala han al-Khalifa han Barein gintahapan ngan ginpakaraot tungod hin mga abuso hin katungdanan hin katawhan, upod in pagpriso, pagkastigo ngan pagbitay hin mga disidente, mga tawo hin oposisyon ha politika ngan an mayoriya nga Shia nga Muslim nga kamolupyohan.

Ginpadukwag han Bahrain an syahan nga ekonomiya katapos-hin-lana o post-oil nga ekonomiya ha Gulfo han Persia, an gindangatan tikang hin mga dekada hin pag-invest ha mga sektor hin banking ngan turismo; damo han mga gidako-i nga institusyon hin panalapi mayda presensya ha pamunuan han nasod. Sugad man, mayda iní hataas nga Human Development Index ngan ginkikilala iní han World Bank nga usá nga hitaas-in-ganansya nga ekonomiya. Api an Bahrain han Nasyones Unidas, Non-Aligned Movement, Arab League, Organisation of Islamic Cooperation ngan han Gulf Cooperation Council.