Roboais (Frans: Roubaix, Nederlands: Robaais) es 'n stad en gemêente in Vrankryk in't Noorderdepartement, dichte by de Belgische grenze. 't Ligt in Frans-Vloandern, mêer bepoald in Rysels-Vloandern. Roboais grenst an de gemêentn Terkoeje, Wattrelos, Leers, Lys-lez-Lannoy, Hem en Croix. Deur Roboais lôopt et Kanoal van Roboais wa in't verlengde ligt van 't Spierekanoal en ezo de verbindienge makt tusschn de Marke en de Schelde.
Roboais es nen oud'n industriestad die me de transiesje en 'n achteruutgang van de produksje-industie der ip verschilligte plekkn wa achtergesteld uutziet (43% van d'inweuners leevn ôok ounder d'armoedegrenze en ezo es Roboais nu êen van d'armste gemêentn van Vrankryk), oloewel da ze pertank ier en doar nieve projektn uut de ground stampn lyk nieve skooln van't ôoger ounderwys of 't museum La Piscine in d'oude zwemkomme in art deco-styl.
De platse es surtout gekend lyk d'ankomstpleke van de koerseklassieker Parys-Roboais. De koerse komt er toe ip de iconische Vélodrome André-Pétrieux. Juuste dervôorn eie ôok nog de latste kasseystroke van de koerse: de Espace Charles Crupelandt (secteur 1, e vrêe makkelyke strooke van 1 sterre).
Ofbeeldiengn die ier by passn ku je vien in de categorie Roboais van Wikimedia Commons.
