Kerav

1 min read
In 46 languages
9 images

Kerav (suom.: Kerava [ˈkerɑʋɑ], roč.: Kervo) om Suomenman lidn valdkundan suves. Se sijadase Udenma-agjan keskuzpalas, valdkundan 31. lidn eläjiden lugun mödhe.

Istorii

Üläkerav- (suom.: Ylikerava) i Alakerav-küläd oliba olmas lidnan sijas 1440-nziš vozišpäi, mülütihe Sipoon tulendha. Vspäi 1643 Kerav-külä mülüi Tuusulan tulendha. Vl 1862 «Hel'sinki — Hämenlidn»-raudtekeskust läbiti küläd i vedi tegimišton edheotandoid. Keravan municipalitetan aluz om pandud vl 1924 erigoitmižel Tuusulan municipalitetaspäi, se voz' znamoičese lidnan alusenpanendan vodeks. Vspäi 1954 municipalitetan pind kadoti nelländest, sen suvipala sijadase Vantaa-lidnas nügüd'. Vl 1970 kätihe Keravad täudeks lidnaks (suom. kaupunki).

Kerav šingotase industrijaližil parkoil, saudihe niid lidnan päivnouzmas, E75-avtotrassan taga. Pästtas söndtavaroid (olud), tekstilid, metalltegesid (keitimpolen mašiništ — «Metos») i meblid, logistine keskuz.

Geografijan andmused

Lidn sijadase Sur' Hel'sinki-regionan päivnouzmas. Keravanjogi (suom.: Keravanjoki 65 km pitte, Vantaa-jogen hura ližajogi, Suomen lahten bassein) läbitab lidnan päivnouzmašt palad.

Matkad Tuusulanjärven (5,9 km²) suvižhe randhasai om viž kilometrad päivlaskmha lidnan keskusespäi, Järvenpää-lidnhasai om 5 km pohjoižhe, Hel'sinkihesai — kaks'kümne kilometrad suvhe avtotel vai raudtedme. Röunatab Tuusulan külämunicipalitetanke päivlaskmas i pohjoižes, Sipoon municipalitetanke päivnouzmas, Vantaa-lidnanke suves. Rahvahidenkeskeine Hel'sinki-Vantaa-lendimport om saudud 12 km suvipäivlaskmha.

Vn 2022 andmusiden mödhe lidnan ühthine pind om 30,79 km², sidä kesken kuivma — 30,63 nellikkilometrad, sokaz ma otab 0,16 km².

Tobmuz

Kerav jagase 11 nimitadud lidnrajonaks (äilugu suom.: kaupunginosat). Municipaline suim kogoneb 51 ezitajaspäi.

Petri Härkönen radoi lidnan edeližen pämehen vll 2010−2016.

Eläjad

Vl 1980 lidnan eläjiden lugu oli 23 851 ristitud, vl 2000 — 30 270 ristitud, vl 2010 — 34 282 ristitud, vl 2020 — 36 789 ristitud. Kaikiš suremb lidnan ristitišt om nügüd'. Lidn om Suren Hel'sinkin magaduzrajonaks, i sen ristitišt ližadub kaikuččel vodel.

Vn 2016 andmusiden mödhe, suomen kel' oli mamankeleks 89,6 % täht lidnalaižišpäi, ročin kel' — 1,2 %, toižed keled — 9,2 %. Vspäi 1953 suomen kel' om kundan üks'jäižeks oficialižeks.