Alavus (mugažo suomen kelel; roč.: Alavo) om Suomenman lidn da lidnankund valdkundan päivlaskmas. Se om Suvipohjanma-agjan kudenz' lidn kahesaspäi eläjiden lugun mödhe.
Istorii
Ezmäine Alavusan jumalanpert' om saudud vl 1677, toine — 1740-nzil vozil. Erigoittud kundan aluz om pandud vl 1865. «Keuruu — Seinjogi»-raudte mäni koumes kilometras pohjoižhe Alavusaspäi, i kaks' keskust tegihe žilos. Se kändihe lidnankundaks (suom.: kauppala) vl 1974, sai lidnan statusad (suom. kaupunki) vl 1977. Vspäi 2013 enzne Töüsä-municipalitet (Töysä, oli olmas vspäi 1896) mülüb lidnha.
Alavus šingotase puižiden sauvondmaterialiden tehmižel, sauvondedheotandoil (projektiruind, ohjanduz).
Geografijan andmused
Lidn sijadase agjan suves, Kirkkojärven (suom.: Kirkkojärvi läz kaht nellikkilometrad pindanke) pohjoižel randal. Kund om alemba mi 30 m ü.m.t. korktusil.
Matkad lidnaspäi agjan Seinjogi-keskushesai om vižkümne kaks' kilometrad lodeheze, Ähtäri-lidnhasai om 30 km päivnouzmha, Virrathasai (Pirkanma) — 43 km suvhe.
Vn 2022 andmusiden mödhe lidnan ühthine pind om 1151,50 km², sidä kesken kuivma — 1087,24 km², sokaz ma otab 64,26 nellikkilometrad.
Tobmuz
Kaik viž lidnrajonad, Töüsä-külän kaks' rajonad i 18 küläd mülüdas lidnankundha. Alavusan municipaline suim kogoneb 31 ezitajaspäi.
Edeline lidnan pämez' om Pekka Ala-Mäenpää (2010 — viluku 2020).
Eläjad
Vl 1980 kundan territorijan eläjiden lugu oli 13 580 ristitud, vl 2000 — 13 135 ristitud, vl 2010 — 12 439 ristitud, vl 2020 — 11 452 ristitud. Kaikiš suremb lidnankundan ristitišt oli 13 781 eläjad vl 1985 i 13 785 eläjad vl 1990. Rahvahantiheduz om 9,98 rist./km² (2024).
Mamankelen mödhe (2016): suomen kel' — 98,6 %, ročin kel' — 0,1 %, toižed keled — 1,4 %.
Galerei
Irdkosketused
- Lidnan oficialine sait (alavus.fi). (suom.)
