Si Cristiano Ronaldo dos Santos Aveiro, higit na kilala bilang si Cristiano Ronaldo (ipinanganak noong 5 Pebrero 1985) ay isang Portuges na propesyunal na manlalaro ng futbol na naglalaro bilang forward para sa Al-Nassr F.C., at siya ring kapitan ng pambansang koponan ng Portugal.
Sa edad na 22, nakatanggap na si Ronaldo ng mga nominasyon sa Ballon d'Or at bilang Manlalaro ng Taon ng Pandaigdigang FIFA (FIFA World Player of the Year). Nang sumunod na taon, noong 2008, napagwagian niya ang kanyang unang gantimpala para sa Ballon d'Or at Manlalaro ng Taon ng Pandaigdigang FIFA. Nasundan ito nang mapanalunan din niya ang FIFA Ballon d'Or noong 2013 at 2014. Nagwagi rin siya ng gantimpala bilang Pinakamahusay na Manlalaro sa Europa ng UEFA ng taong 2013-14. Noong Enero 2014, naiskor ni Ronaldo ang kanyang ika-400 na goal ng kanyang karerang propesyunal para sa koponan at sa bansa sa edad na 28.
Itinuturing si Ronaldo ng ilan sa mundo ng palakasan bilang kasalukuyang pinakamahusay na manlalaro sa buong daigdig at isa sa mga pinakamahuhusay sa lahat ng panahon, kadikit lamang ang karibal na si Lionel Messi. Siya ang unang Portuges na manlalaro ng futbol na nagwagi ng tatlong FIFA/Ballon d'Or, at ang ikalawang manlalarong nagwagi ng tatlong gantimpala ng Ginintuang Sapatos ng Europa (European Golden Shoe). Kung isasama ang Manchester United at Real Madrid, nagwagi na si Ronaldo ng tatlong Premier League, isang La Liga, isang FA Cup, dalawang Football League Cup, dalawang Copa del Rey, isang FA Community Shield, isang Supercopa de España, dalawang UEFA Champions Leagues, isang UEFA Super Cup, at dalawang FIFA Club World Cup.
