ಸಿರಿಯಾ-ಅಧಿಕೃತವಾದ್ ಸಿರಿಯನ್ ಅರಬ್ ಗಣರಾಜ್ಯ- ಪಶ್ಚಿಮ ಏಷ್ಯಾದ ಪೂರ್ವ ಮೆಡಿಟರೇನಿಯನ್ ಬೊಕ್ಕ ಲೆವಂಟ್ ಪ್ರದೇಶಡ್ ಇಪ್ಪುನ ಒಂಜಿ ದೇಶ. ಇಂದೆತ ರಾಜದಾನಿ ಡಮಾಸ್ಕಸ್. ಸಿರಿಯಾದ ಪಡ್ಡಾಯಿಡ್ ಮೆಡಿಟರೇನಿಯನ್ ಸಮುದ್ರ, ಬಡಕಾಯಿ ಬೊಕ್ಕ ವಾಯುವ್ಯಡ್ ತುರ್ಕಿ, ಮೂಡಾಯಿ ಬೊಕ್ಕ ಆಗ್ನೇಯಡ್ ಇರಾಕ್, ತೆಂಕಾಯಿಡ್ ಜೋರ್ಡಾನ್ ಬೊಕ್ಕ ನೈಋತ್ಯಡ್ ಇಸ್ರೇಲ್ ಅಂಚನೆ ಲೆಬನಾನ್ ದೇಸೊಲು ಉಲ್ಲ. ಸದ್ಯೊಗು ಸಿರಿಯಾ ದೇಸೊಡು ಹಂಗಾಮಿ ಸರಕಾರ ಉಂಡು. ಈ ದೇಸೊಡು ಒಟ್ಟು ೧೪ ಪ್ರಾಂತ್ಯೊಲು ಉಲ್ಲ. ೧,೮೫,೧೮೦ ಚದರ ಕಿಲೋಮೀಟರ್ ಇಸ್ತೀರ್ನೊ ಇಪ್ಪುನ ಸಿರಿಯಾಡ್ ಅಂದಾಜಿ ೨.೬ ಕೋಟಿ ಜನಸಂಖ್ಯೆ ಉಂಡು. ಜನಸಂಕೆದ ಲೆಕ್ಕೊಡು ಪ್ರಪಂಚೊಡು ೫೬ನೇ ಸಾನೊಡು ಬೊಕ್ಕ ಇಸ್ತೀರ್ನೊದ ಲೆಕ್ಕೊಡು ೮೭ನೇ ಮಲ್ಲ ದೇಶ ಆತ್ಂಡ್.
ಇತಿಹಾಸೊ
ಸಿರಿಯಾ ಪ್ರಪಂಚೊದ ಕೆಲವು ಪಿರಾಕ್‌ದ ನಾಗರಿಕತೆಲೆನ ತಾಣ ಆತ್ಂಡ್. ಮುಲ್ಪ ಇತಿಹಾಸಜ್ಞೆರ್ ಮಲ್ತಿನ ಉತ್ಕನನಡ್ದ್ ಪರತ್ ಶಿಲಾಯುಗತ್ತ ಕಾಲೊಗು -ಸುಮಾರು ಕ್ರಿ.ಪೂ. ೮,೦೦,೦೦೦- ಸೇರ್ದಿನ ಅವಶೇಶೊಲು ತಿಕ್ಕ್‌ದ್ಂಡ್. ಅತ್ತಂದೆ ಮಧ್ಯ ಪ್ಯಾಲಿಯೋಲಿಥಿಕ್ ಕಾಲಡ್ ಇತ್ತಿನ ನಿಯಾಂಡರ್ತಾಲ್ ನರಮನಿನ ಜೋಕುವೆನ ಪೂರ್ತಿ ಅಸ್ತಿಪಂಜರದಂಚಿನ ಪಳೆಯುಳಿಕೆಲು ತಿಕ್ಕ್‌ದ್ಂಡ್. ಸುಮಾರು ಕ್ರಿ.ಪೂ. ೧೦,೦೦೦ ದ ಪೊರ್ತುಗು ಸಿರಿಯಾ ನವಶಿಲಾಯುಗದ ಸಂಸ್ಕೃತಿದ ಪ್ರಮುಖ ಕೇಂದ್ರ ಆದಿತ್ತ್ಂಡ್‌ಗೆ. ಈ ಪೊರ್ತುಡು, ಪ್ರಪಂಚಡ್ ಸುರುತ ಸರ್ತಿ ಕೃಷಿ ಬೊಕ್ಕ ಕೈಕಂಜಿಲೆನ್ ಸಾಂಕುನ, ಅಯಿತ ಒಟ್ಟುಗು ಆಯತಾಕಾರದ ಇಲ್ಲ್‌ದ ರಚನೆಲು, ಪಿರಾಕ್‌ದ ಕಲ್ಲ್ ಬೊಕ್ಕ ಸುಟ್ಟಿನ ಸುಣ್ಣದ ಬಾಜನೊಲು ಅಂಚನೆ ವ್ಯಾಪಾರ ಸಂಬಂಧದ ಸಾಕ್ಷಿಲು ಈ ಜಾಗೆಡ್ ತೋಜಿದ್ ಬತ್ತ್ಂಡ್.
ಪರ್ಷಿಯನ್ನೆರ್, ಗ್ರೀಕೆರ್ ಬೊಕ್ಕ ರೋಮನ್ನೆರೆನಂಚಿನ ಪ್ರಮುಖ ಶಕ್ತಿಲು ಈ ಜಾಗೆದ ಮಿತ್ ಆಕ್ರಮಣಮಲ್ತೆರ್. ಅತ್ತಂದೆ ಬೈಜಾಂಟೈನ್ ಸಾಮ್ರಾಜ್ಯ ಬೊಕ್ಕ ಅಯಿರ್ದ್ ಬೊಕ್ಕ ಬತ್ತಿನ ಬೇತೆ ಬೇತೆ ಬಲಿಷ್ಠ ಇಸ್ಲಾಮಿಕ್ ಖಲೀಫಶಾಹಿಲು ಮುಲ್ಪ ಅದಿಕಾರ ಚಲಾವಣೆ ಮಲ್ತೊ. ಮಸ್ತ್ ಶತಮಾನೊಲೆಡ್, ಈ ಜಾಗೆದ ನಿಯಂತ್ರಣ ಉಮಯ್ಯದ್ ಬೊಕ್ಕ ಅಬ್ಬಾಸಿದ್ ಖಲೀಫಶಾಹಿಲು, ತುಲುನಿಡ್ ಬೊಕ್ಕ ಇಖ್ಷಿದಿಡ್ ರಾಜವಂಶೊಲು, ಸೆಲ್ಲುಕ್‌ಲು, ಜೆಂಗಿಡ್‌ಲು ಬೊಕ್ಕ ಅಯ್ಯುಬಿದ್ ರಾಜವಂಶೊಲು ಸೇರಿನಂಚನೆ ಮಸ್ತ್ ಪ್ರಮುಖ ಮಧ್ಯಕಾಲೀನ ಸಾಮ್ರಾಜ್ಯೊಲೆನ ನಡುಟು ಬದಲಾವೊಂದು ಇತ್ತ್ಂಡ್. ಅಕೇರಿಗ್ ಉಂದು ಒಟ್ಟೋಮನ್ ಆಳ್ವಿಕೆದ ಅಡಿಕ್ಕ್ ಬತ್ತ್ಂಡ್.
ಅಕ್ಟೋಬರ್ ೨೪, ೧೯೪೫ ಗ್ ವಿಶ್ವಸಂಸ್ಥೆದ ಸನ್ನದುಗು (United Nations Charter) ಸಹಿ ಪಾಡಿನ ಬೊಕ್ಕ ಸಿರಿಯಾ ಸುರುತ ಸರ್ತಿಗ್ ಪೂರ್ತಿ ಸ್ವತಂತ್ರ ದೇಶವಾದ್ ಉದಿತ್ಂಡ್. ಈ ಸನ್ನದುಡ್ದಾವರ ಏಪ್ರಿಲ್ ೧೯೪೬ ದ ಪೊರ್ತುಗು ಈ ಜಾಗೆದ ಮಿತ್ತ್ ಇತ್ತಿನ ಫ್ರೆಂಚ್ ಆಡಳಿತ ಅಂತ್ಯ ಆಂಡ್. ೧೯೫೮ನೇ ಇಸವಿಡ್, ಯುನೈಟೆಡ್ ಅರಬ್ ರಿಪಬ್ಲಿಕ್ ನ್ ಉಂಡುಮಲ್ಪೆರೆ ಸಿರಿಯಾ ಒಂತೆ ಸಮಯ ಈಜಿಪ್ಟ್ ದ ಒಟ್ಟುಗು ಸೇರೊಂಡು. ಆಂಡ ೧೯೬೧ ಡ್ ತನ್ನ ಸ್ವಾತಂತ್ರ್ಯನ್ ಪಿರ ದೆತೊನೆರೆಗಾತ್ ಅಯಿರ್ದ್ ಪಿದಯಿ ಬತ್ತ್ಂಡ್.
೧೯೬೩ ರ್ದ್ ೨೦೨೪ ಮುಟ್ಟ ಈ ದೇಶನ್ ಬಾತ್ ಪಕ್ಷ ಆಳ್ವಿಕೆ ಮಲ್ತ್ಂಡ್, ಅಯಿಟ್ ೧೯೭೧ ರ್ದ್ ಅಸ್ಸಾದ್ ರಾಜವಂಸೊ ಪೂರ್ತಿ ಅಧಿಕಾರನ್ ತನ್ನ ಕೈಟ್ ದೀವೊಂದಿತ್ತ್ಂಡ್. ಮಸ್ತ್ ಸಮಯದ ಅಂತರ್ಯುದ್ಧ ನಡತಿ ಬೊಕ್ಕ ೨೦೨೪ ಡ್ ಅಸ್ಸಾದ್ ರಾಜವಂಸೊದ ಗುರ್ಕಾರ್ತಿಕೆ ಬುರ್ದು ಪೋಂಡು. ಮಾರ್ಚ್ ೨೯, ೨೦೨೫ ಡ್ ಸ್ಥಾಪನೆ ಆಯಿನ ಹಂಗಾಮಿ ಸರಕಾರ ಇತ್ತೆ ಸಿರಿಯಾ ದೇಸೊನು ನಡಪಾವೊಂದುಂಡು.