.jpg?width=1280)
Lu Regnu di Thailandia è nu statu di l'Asia urientali, canusciutu macari cumu Siam, nomu chi appi nzinu a lu 1939.
La parola Thailandia diriva di Thai, ca voli diri lìbbiru.
La capitali è Bangkok, la pupulazzioni è di 61miliuna di abbitanti, la supirfici è di 513mila chilòmitri quatrati. Lu re attuali è Rama X.
Giugrafia
Cunfina
La Thailandia s'attrova ntî la parti cintrali di la pinìsula indo-cinisa e nnâ parti di la pinìsula Malisa. Cunfina a ovist e nord-ovist cu lu Myanmar (Birmania), a nord-est ccu lu Laos, a sud-est ccu la Camboggia e a sud ccu la Malaysia; s'affaccia a lu Mar di li Andamini e a sud-ovest nta lu gulfu di lu Siam a sud.
Lu clima e li carattirìstichi fìsichi
Lu tirritòriu, 'n granni parti chianiggianti, si dilimita a nord e a est di tanti catini muntagnusi, ca agghìcanu a nu màssimu di 2000 metri. A lu centru c'è la granni chianura di lu ciumi Menum, lu cursu d'acqua cchiù mpurtanti di lu Paisi; ntî la staggiuni dî chioggi, lu Menum allaca la chianura e addipòsita nu fèrtili limu, pirfettu ppi la cultivazzioni dû risu. Ntra l'àutri ciumi cchiù mpurtanti cc'è lu Mekong, ca scurri ê cunfini cu lu Laos.
'N facci a la Thailandia ci su' assai ìsuli: li cchiù mpurtanti sunnu li Samui (nti lu golfu di Siam) e Phuket (nti lu mari di li Andamini).
Lu clima è trupicali e è nfruinzatu di li monsoni: la staggiuni dî chioggi và di giugnu a uttùviru ntî la custa uccidintali e di uttùviru a jinnaru ntî chidda urientali.
Storia
Lu primu regnu unitàriu di lu Siam, cu la capitali Ayuyyhaya, veni furmatu ntî lu XIV sèculu. Cchiù nn'avanti lu Paisi, ca nun fu mai culunizzatu di li Eurupei, arristau ppi sèculi cuvirnatu di na munarchìa assuluta. Lu nomu di Thailandia venni aduttatu ntî lu 1939.
Doppu la secunna guerra munniali, (cummattuta cô Giappuni), la munarchìa addivenni custituzzionali, ma lu Statu è ancura nnî manu dî riggimi militari.
La pupulazioni e li cità
La pupulazzioni è cumpusta di la cchiossai parti dû gruppu di li thai e è di riliggiuni buddhista. Diversamenti di àutri Paisi dâ riggioni, lu ncrimentu pupulari scinnìu assai, a sècutu dî campagni pi la chianificazioni dî famigghi fatti pi cummàttiri la puvirtà e la fami.
La genti si cuncentra 'n particulari ntô sud dû Paisi, la zona cchiù fèrtili, e càmpanu sempri ntî li villaggi fatti di casi di lignu custruiti supra li ciumi, li palafitti. Nzina la cità cchiù granni, la capitali Bangkok, è fabbricata ntê rivi di nu ciumi, lu Menam, tantu ca veni chiamata la Vinezia d'urienti. Ccà ci vivi lu 20% dâ pupulazioni.
L'àutri cità su' assai cchiù picciriddi: li cchiù mpurtanti su Chiang Mai, Nakhon Ratchasima e Surat Thani.
L'ecunumìa
Nni l'ùrtimi dicenni l'ecunumìa appi nu nicu sviluppu: l'agricultura è assai pruduttiva, grazzi a li chianuri fèrtili, unni si cultiva risu. Li furesti sunnu ricchi di ligna priggiati, cumu lu teak. Sunnu abbunnanni li risorsi minirarî. Nni l'ùrtimi dicenni lu Paisi appi nu sviluppu di l'attivitati nnustriali. 'N crìscita è macari lu turismu.
