Ансамбл (лат. ansambl, франц. ensemble – заєднїца, ґрупа) може мац вецей значеня.
Перше значенє пообщене, и значи цалосц, ґрупу и заєднїцу.
Найчастейша конотация того поняца вяже ше за ґрупу уметнїкох, та так у музики ансамбл то состав, ґрупа музичарох лєбо шпивачох. То може буц ґрупа музичарох инструменталистох у камерним ансамблу од трох по двацец музичарох: трио, квартет, квинтет, секстет, октет, нонет, алє и симфонийски оркестер. До ансамбла тиж спадаю вокални ґрупи и хор шпивачох.
По теориї музики, ансамбл то тип музичного склопу солистичней полифониї и гомофониї хтори ше розликує од хорского вецейглася.
Музично-драмски часци сценских дїлох як цо то опера, опера буфо, оперета и мюзикл можу ше наволац же то ансамбли. Векши вокално-инструментални дїла як цо то ораториюм, кантата и концерт-композиция тиж
спадаю до ансамблох. У обидвох формох наступаю вєдно ґрупа уметнїкох.
У театралним смислу, ансамбл творя ґлумци, т.є. ґрупа хтора заєднїцки виводза сценски дїла. То орґанизовани особи-уметнїки (ґлумци режисере, сценоґрафи, костимоґрафи и други), хтори найчастейше поряднє анґажовани. Ансамбл можу твориц ґрупа ґлумицох и ґлумцох алє и других виводзачох уметнїкох составених и орґанизованих пре виводзенє єдней представи, т.є. драмского проєкту. Так углавним у театралних хижох исную драмски, оперски, балетски и други ансамбли.
Же би успишно музичар участвовал у ансамблу нє достаточне лєм же би знал як солиста грац на своїм инструменту. Гранє музичара у ансамблу ше розликує од соло наступу як окремней файти виводзацкей уметносци, хтора подрозумює формованє окремного знаня и схопносци, односно то особлївосци виводзацких квалитетох ансамбла. Кнїжка А. Готлиба Основи ансамбл технїки (1971), у хторей описани „технїки ансамбла” и концепт по хторим ше уводзи до музичней педаґоґиї, и подрозумює значне доприношенє преучованю теориї и пракси граня у ансамблу и ище вше нє страцело значенє и релевантносц.
Робота ансамбла у сучасней музики
У прешлосци дїла за ансамбли (ґрупи) ше углавним виводзели на живо на рижнордних концертох. 20. вик допринєсол велї иновациї у технолоґиї та и инструментох и формованє звукох. Опрема за знїманє ше усовершовала та так и перформанс ансамбла прецерпйовал фундаментални пременки. Звук ансамблох, ґрупох ше у новших часох нє посцигує зоз живим виводзеньом, алє зоз методу поновного презнїмованя, лєбо хаснуюци рахункар и секвенцери. Праве пре таки пременки и обставини дзекуюци хаснованю електронских музичних инструментох и музичних справох, дїла за асамбли часто постали лєм у форми продукциї.
