Emma Goldman (1869–1940) oli legenduarine anarhistu da naizien oigevuksien da seksuallizen vällyön puolistai. Häi rodivui jevrieläzeh pereheh Litvas, kudai kuului silloi Ven’an suarikundah, da vaihtoi eloipaikan Amerikan Yhtysvaldoih 16-vuvven igähizenny, mis händy kuččuttih ”Ruskei Emma”-nimel.
Goldman oli koskii julgine paginpidäi da pädevy propagandistu, kudai otettih kiini lugemattomii kerdoi hänen aktivismas, a FBI:n johtai J. Edgar Hoover kuvaili händy ”varattavimannu naizennu Amerikas”. Goldman ruadoi higipajois, voimattomanhoidajannu, massažistannu da 1890-luvul häi avvutti pidämäh jiämaidolaukkua Alexander Berkman-dovarišanke (kudai oli sežo kuulužu anarhistu da voinanvastaine aktivistu). Konzu Berkman vangittih, Goldman avvutti organizuičemah ruohtijua tyrmymurduo da kaivoi tunnelin tyrmäh lähäzes talospäi, hos tämä pluanu ei menestynyh. Lopukse Goldman käskiettih iäre Yhtysvalloispäi hänen ruadamizen täh Ven’ale, kus Goldman liittyi vallankumovukseh, hos häi rubei kritikuičemah bolševikkien valdivuo, konzu hyö allettih tukehtuttua ruadajien vastahtoimiloi da protestoi. Myöhembäh Goldman ajoi Ispuanieh avvuttamah borčas fašizmua vastah Ispuanien rahvahankeskeizen voinan aigua da häi pyzyi aktiivizennu eloksen loppussah.
