Lo Domesday Book (tanben conegut coma Domesday o Winchester Book), foguèt lo primièr registre d'Anglatèrra redigit en 1086 per lo rei Guilhèm lo Conquistaire; es similar a un recensament actual.
Lo nom ven d'un mot de l'anglés ancian «dom» (comptar o comptabilitat) e «day» (jorn), domesday significa doncs lo jorn al qual lo senhor e sos feudataris fan los comptes. Dins las religions crestianas, lo mot semblant doomsday s'utiliza per designar lo Jutjament darrièr, quora segon la teoria escatologica del libre de l'Apocalipsi, Jèsus de Nazaret auriá de tornar per far los comptes de cadun dels umans.
La tradicion vòl que a nadal 1085 Guilhèm èra a Gloucester e «aguèt una longa conversacion amb sos conselhèrs e envegèt sos òmes de pertot en Anglatèrra per anar dins cada vilatge (…) per enquèstar quantas tèrras e quant bestiam cada propietari possediá e quala n'èra la valor». Voliá d'informacions sul país qu'acabava de conquistar per lo poder administrar e gravar las tèrras amb d'impostes. Lo registre que teniá fòrça de lei, es escrit en latin, e de còp que i a en lengua vernaculara quand i aviá pas d'equivalent latin.
