Andalosia es una comunautat autonòma del sud d'Espanha reconeguda coma nacionalitat istorica d'acòrd amb son Estatut d'Autonomia. Es compausada de uèit províncias: Almeria, Cadis, Còrdoa, Granada, Huelva, Jaén, Malaga e Sevilha. La capitala n'es Sevilha, mentre que lo sèti del Tribunal Superior de Justícia es la ciutat de Granada.
Etimologia
Lo toponim «Andalosia» foguèt introduit dins la lenga espanhòla cap al sègle xiii jos la forma «el Andalucía». Tira del mot Al-Andalusyia, gentilici e adjectiu utilizat en arab parlat en Al Andalós, nom donat a la peninsula Iberica durant lo regim islamic entre 711 e 1492.
Geografia
L'istorian andalós Antonio Domínguez y Ortiz escriguèt:
| « | Cal cercar l'esséncia d'Andalosia dins sa realitat geografica d'un costat, e de l'autre dins la consciéncia de sos abitants. Del punt de vista geografic, l'ensemble de las tèrras meridionalas es tròp vasta e variada per èsser compresa coma una sola unitat. En realitat non i a doas, mas tres Andalosias: la Sierra Morena, la Val [del Guadalquivir] e la [Cordillera] Penibetica. | » |
