Vigilie (latin for 'nattevak' eller 'vaking', norrønt vaka) er innan kristen tradisjon ei religiøs handling som føregår om natta. Det kan til dømes visa til gudstenester før kyrkjelege festdagar, som påskevigilia på påskeaftan og julevigilia på julaftan.
I oldkyrkja var det vanleg at kristne kom saman kvelden før ei viktig høgtid og førebudde seg gjennom vake, bøner, skriftlesing og eventuelt også andakt. Slike markeringar kunne utvikla seg til vill festing, og ved eit kyrkjemøte i 1231 blei dei fleste vigiliene gjennom natta avskaffa.
