Lewis Capaldi

Capaldi var fødd i Glasgow, men voks hovudsakleg opp i Bathgate i West Lothian. Han lærte seg å spela gitar då han var ni, og starta musikkarrieren sin i 12-årsalderen med å syngja på pubar. Han slapp debutskiva si, Bloom EP, 20. oktober 2017 i eit samarbeid med den grammyprisvinnande produsenten Malay, som hadde arbeidd lenge saman med Frank Ocean.

Capaldi fekk suksess gjennom å lasta opp opptak av seg sjølv i soverommet sitt på SoundCloud, som blei oppdaga av manageren Ryan Walter. Den 31. mars 2017 slapp han den første låten sin, «Bruises». Låten var snart blitt spelt nær 28 millionar gongar på Spotify verda over, og Capaldi blei den usignerte artisten som raskast nokon gong hadde nådd over 25 millionar avspelingar på plattforma. Like etterpå skreiv han kontrakt med plateselskapa Virgin EMI Records og Capitol Records.

Høgare kjendisfaktor og europaturné (2017-2018)

I slutten av 2017 blei Capaldi lista av Vevo DSCVR som ein av «Artists to Watch 2018». Han var òg med på første Sound of-lista til BBC Music, Sound of 2018.

Capaldi varma opp for Rag'n'Bone Man på europaturnéen hans i november 2017, og for Milky Chance på den nordamerikanske delen av Blossom-turneen deira i januar 2018. Han fekk merksemd ifrå kjendisar som Chloë Grace Moretz, Kygo, James Bay, Ellie Goulding og Niall Horan. Horan bad Capaldi om å opna for han på to show på Flicker World Tour; på Glasgow SEC Armadillo i mars 2018. I mai 2018 følgde Capaldi med Sam Smith på turneen hans The Thrill of It All European Tour, og varma opp for Smith på 19 konsertar. Deretter kunngjorde han at han skulle ut på ein ny turné i Storbritannia og Europa elles, på scenar med kapasitet for 2000 tilhøyrarar.

13. juli 2018 blei Capaldi del av BBC Radio 1 si «Brit List», som garanterte han tre Radio 1-spelelister. I august 2018 baud det irske indierockbandet Kodaline inn Capaldi som oppvarmar på ein konsert i Belfast. Elles spelte Capaldi på fleire festivalar sommaren 2018, mellom anna Lollapolooza, Bonnaroo, Firefly, Mountain Jam, Osheaga, Reading & Leeds Festival, Rize og TRNSMT.

Capaldi gav ut sin andre EP, Breach, den 8. november 2018. Denne inneheldt dei tidlegare slopne singlane «Tough» og «Grace», i tillegg til den nye låten «Someone You Loved» og ein demo-versjon av «Something Borrowed».

2019–2020: Divinely Uninspired to a Hellish Extent

Breach-sporet «Someone You Loved» blei gjennombrotssingelen til Capaldi, og nådde topplistene i 29 land. Medan han var på turne med Bastille i 2019, nådde songen fyrsteplassen på UK Singles Chart, og heldt posisjonen i 7 veker. Han nådde også fyrsteplassen på Billboard Hot 100, og blei med det den fyrste skotske soloartisten til å toppa listene i USA sidan Sheena Easton i 1981. Songen blei nominert til ein grammypris for Song of the Year. Ifølgje IFPI var songen den 9. største singelen i verda i 2019. Eit anna spor frå Breach «Grace», nådde 9. plassen i Storbritannia same året. Begge songane var med på debutalbumet til Capaldi, Divinely Uninspired to a Hellish Extent. Singelen «Hold Me While You Wait», som følgde albumet som digital nedlasting, gjekk inn på den britiske singellista på 4. plassen.

Capaldi blei nominert til Brit Critics' Choice Award ved Brit Awards i 2019, men tapte for Sam Fender. Ved slutten av mars opna Capaldi for det irske bandet Picture This i Irland. I april kom dataspelet Days Gone ut med songen hans «Days Gone Quiet» som avsluttingsspor. Songen fekk nominasjonar frå Game Audio Network Guild Awards og NAVGTR Awards.

Sommaren 2019 opptredde Capaldi ved fleire festivalar, som Belsonic i Belfast, der han opna for The Killers, og Glastonbury Festival. Frå 16. til 26. august opna han for Ed Sheeran ved slutten av verdsturneen hans Divide på fire konsertar i Ipswich og Leeds. Mot slutten av året blei ei utvida utgåve av debutalbumet hans gjeve ut i lag med singelen «Before You Go», som blei den andre topplåten hans på UK Singles Chart 31. januar 2020.

Initiativet LiveLive blei starta for å hjelpa konsertgjengarar til å ha ei betre oppleving på konsertane hans. Ved Brit Awards 2020 fekk Capaldi tre nominasjonar, og vann to av dei. To songar skrivne av Capaldi blei også gjevne ut dette året: Rita Ora sin «How to Be Lonely» og Sigala sin «Lasting Lover».

2021–no: Broken by Desire to Be Heavenly Sent

I mars 2021 kunngjorde Capaldi at han ville utsetja alle komande konsertar for å arbeida på det neste albumet sitt. Han kom tilbake sommaren 2022 for å spela dei utsette konsertane, mellom anna ved TRNSMT-festivalen, Latitude Festival og Isle of Wight Festival.

Den fyrste singelen «Forget Me» frå andrealbumet hans, Broken by Desire to Be Heavenly Sent, kom ut i september 2022, og blei den fyrste songen hans til å byrja på toppen av UK Singles Chart. Seinare same månaden kom frosenpizzamerket hans «Big Sexy Pizza» ut i dei britiske supermarknadane Iceland og Tesco. Han fekk sin fjerde singel på fyrsteplassen med «Pointless» i januar 2023.

I april 2023 fekk Capaldi den femte fyrsteplassen sin med «Wish You the Best». I april 2023 kom også dokumentaren hans How I'm Feeling Now ut på Netflix, der Capaldi snakka om kjenslene sine knytte til å plutseleg blir kjendis, og problema sine med angst og Tourettes syndrom, som han nyleg var blitt diagnostisert med. I mai 2023 kunngjorde han at han skulle framføra eit intimt oppvarmingssett i juni før Reading and Leeds Festival, med support frå James Marriott, men Capaldi avlyste seinare konserten på grunn av mentale helseproblem. I juni 2023 gjorde Capaldi det kjent at han ville ta ein lengre pause frå turnering for å fokusera på den mentale og fysiske helsa si. Tidlegare den månaden hadde settet hans ved Glastonbury Festival blitt forstyrra av noko som verka som ein episode av Tourettes syndrom, sjølv om publikum hjelpte til med å avslutta framføringa. I juni 2025 vende han uventa tilbake til Glastonbury i den fyrst offentlege framferda si etter at han hadde annonsert pausen sin.

11. april 2025 slapp Capaldi coverversjonen sin av Britney Spears sin song «Everytime» på Internett. Han gjekk inn på UK Singles Downloads Chart på 36. plassen.

Studioalbum

EP-ar

• Offisiell nettstad