Bilal Hassani (fødd 9. september 1999) er ein fransk songar, låtskrivar, publikumspåverkar og videomakar. Han er kjend for sine musikkvideoar på YouTube, og han deltok i den TV-sende talenttevlinga The Voice Kids i 2015. I 2019 representerte han Frankrike i Eurovision Song Contest i Tel Aviv med songen «Roi».
Bakgrunn
Bilal Hassani vart fødd i Paris og har marokkansk opphav. Han har ein eldre bror, Taha Hassani (fødd 1995). Foreldra skilde seg då Bilal var to år gammal.
Som femåring byrja han å opptre og syngje for familien, og tok deretter songtimar. I 2015 vart han overtalt av komikarvennen Nemo Schiffman til å delta i den franske talenttevlinga The Voice Kids på TV-kanalen TF1. Der opptredde han med Eurovision-vinnarsongen «Rise Like a Phoenix» av idolet sitt, den austerrikske dragqueen-artisten Conchita Wurst. Han vart anteken av dommarane og fekk songaren Patrick Fiori som mentor. Hassani vart til slutt slått ut i andre runde.
I desember 2018 vart Hassani offentleggjord som ein av 18 deltakarar i songtevlinga Destination Eurovision på France 2, den franske uttakinga til Eurovision Song Contest. Han deltok med songen «Roi», som vart sloppen 4. januar 2019. Hassani vann sin semifinale 12. januar 2019 og seinare finalen laurdag 26. januar 2019. Han fekk dimed representere Frankrike i Eurovision Song Contest i Tel Aviv 14.–18. mai 2019. Som ein av dei fem største økonomiske bidragsytarane, var Frankrike direktekvalifisert til finalen 18. mai, og Hassani hadde startnummer 21. I finalen vart han nummer 16 av 26 deltakarar.
Privatliv
I 2017 vart Hassani uteksaminert frå vidaregåande, og 23. juni same år kom han offentleg ut som homofil via sosiale medium. Han er kjend for sin androgyne stil og for flamboyante opptredenar og kostyme. I 2018 peika homo-magasinet Têtu ut Hassani som ein av «30 LHBT-personar som utviklar Frankrike» og kalla han eit «ikon for fransk LHBT-ungdom».
Hassani har sidan motteke rasistiske og homofobiske angrep via sosiale medium, og han har motteke fleire dødstrugslar via nettet. Samskipnadene Urgence Homophobie og Stop Homophobie har gått saman om å oppsøkje og rettsleg forfølgje personane som har uttrykt hat mot Bilal Hassani på sosiale medium.
Diskografi
Album
- 2019: Kingdom
Singlar
- 2016: «Wanna Be»
- 2017: «Follow Me»
- 2017: «House Down»
- 2018: «Shadows»
- 2018: «Heaven With You»
- 2019: «Roi»
- 2019: «Jaloux»
Referansar
- Denne artikkelen bygger på «Bilal Hassani» frå Wikipedia på bokmål, den 29. desember 2021.
