Wapen/Flagg Koort
Syke (IPA|ˈziːkə) is en Stadt in Neddersassen un en Middelzentrum in’n Noorden vun den Landkreis Deefholt. Dor leevt up 12,89 km² 25.841 Inwahners (Stand 1. Januar 2007). De Naam Syke kümmt vun dat plattdüütsche Woort „Sieke“ vun her. Dat heet so veel, as „natt Sietland“. Dorüm warrt dat ok mit en lang ie utsproken un nich as Süke.
Geographie
Geograaphsche Laag
Syke is de gröttste Stadt in den Landkreis Deefholt. Se liggt in Oosten vun den Natuurpark Wilshuser Geest, bi 19 km (Luftlinie) süüdlich vun Bremen. Dör de Stadt flutt de Hache dör. Üm Syke to liggt de groten Staatsforsten Fredeholt un Westermark.
Wie sik de Stadt updeelt
Stadtdelen
An’n 1. Januar 1979 hefft in Syke 19.413 Inwahners leevt. Bit to’n 1. Januar 1989 sünd dat sogor noch weniger wurrn. Dormols weern dat 18.776. Miteens föhr de Tog avers annersrüm: An’n 1. Januar 1999 leven al 24.398 Lüde in Syke un an’n 1. Januar 2007 weern dat midderwielen 25.841.
(Inwahners an’n 31. Dezember 2006)
Klima
Historie
In en List vun Bruggen över de Werser ut dat Johr 1225 steiht to’n eersten Mol de Naam vun de Stadt, so as de hüde noch schreven warrt. 1974 is de hüdige Stadt ut de vörmolige Stadt Syke un twölf Gemeenden, de dor umto liggen döen, tohopensett wurrn. Bit 1977 weer Syke Kreisstadt vun den Landkreis Graafschop Hoya. In dat Johr 1978 geev dat avers en Kreisreform. Man bit in dat Johr 2004 is en grote Butenstell vun de Verwalten vun den Landkreis Deefholt in Syke bleven. Eerst denn hett de Landkreis all sien Verwalten in Deefholt tohopenfaat. To hett se to’n Deel Kammern för anhüürt. In dat vörmalige Syker Kreishuus sünd midderwielen annere Behörden ansiedelt wurrn. Dor gifft dat hüdigendags ok en Twiegstell vun dat Syker Gymnasium.
Dat Auto-Kennteken vun den Landkreis Graafschop Hoya weer dormols SY ween. Na de Reform vun de Verwalten in dat Johr 1978 is düsse Landkreis updeelt wurrn mank de Landkreisen Nienborg, Ollnborg un Deefholt. Vunwegen dat dat in den vörmaligen Landkreis Graafschop Hoya veel landweertschoppliche Bedrieven gifft, kann een hen un wenn noch hüdigendags Fohrtüüch un Hängers för de Bueree mit dat ole Kennteken SY drepen.
Politik
Stadtraat
An’n 10. September 2006 sünd in Neddersassen nee Kommunalparlamenten wählt wurrn. De sünd nu al vun’n 1. November 2006 af an in’n Amt. Vunwegen dat de vörmolige Stadtraat dat so beslaten harr, is de Syker Stadtraat nun wat lüttjer maakt wurrn. Dat gifft nich mehr 34 Sitten, man bloß noch 30. Dor kümmt noch de Borgermeester to. Düsse Sitten sünd nu hüdigendags so updeelt:
- SPD 12 Sitten
- CDU 9 Sitten
- FDP 3 Sitten
- De Grönen 2 Sitten
- SYKEplus 2 Sitten
- Wählergemeenschop Syker Börger (WSB) 1 Sitt
- Wählergemeenschop Huntemann 1 Sitt
De FDP-Fraktschoon un de Vertreder vun de WSB hefft sik to en Grupp tohopenslaten.
Börgermeester Dr. Harald Behrens, de al in’t Amt weer, hett an’n eersten Wahldag de afsolute Mehrheit vun de Stimmen, de afgeven wurrn sünd, knapp verpaßt. 18 Stimmen hefft em fehlt, man bi de Stickwahl an’n 24. September 2006 hett he denn mit mehr as 76% wunnen. Dor is he mit för nochmol acht Johren to’n Borgermeester maakt wurrn.
Wapen
Stadtpartner- un -patenamt
In de 50er Johren övernehm Syke dat Patenamt för Lüde, de in de vörmolige Kreisstadt Wehlau in Oostpreußen leevt harrn. In dat Syker Kreismuseum gifft dat dor ok um en „Wehlauer Heimaatstuuv“. Jedet Johr gifft dat hier ok en Heimaatdrepen.
Vun 1973 af an is Syke Stadtpartner vun den franzööschen Canton La Chartre-sur-le-Loir in dat Département Sarthe.
Vun 2006 af an is Syke Partner vun de poolsche Stadt Wąbrzeźno in dat nöördliche Zentralpolen, bi 50 km noordööstlich uon Torun in de Woiwodschaft Kujawien-Pommern
Vun den Anfang vun de 90er Johren her gifft dat al gode Kuntakten na de poolsche Stadt Brodnica hen. Dat Gymnasium in Syke tuuscht jummers wedder Schölers mit dat Gymnasium in Brodnica un ok mit de Stadt Nischni Nowgorod in Russland.
Wat dat to sehn gifft
- Wenn een up de B 6 (in Syke: „Herrlichkeit“) na Bremen hen ut de Stadt rutgeiht, finnt een up’e lunke Siet dat „Kreismuseum“. Dat is en Heimaat- un Freeluftmuseum, wo dat allerhand antokieken gifft. Besunners över dat Handwark, de Bueree, de Huusweertschop, de Kultuurgeschicht, Natuurkunn, Vör- un Fröhgeschicht gifft dat veel to sehn. Dat Museum is al 1937 inricht wurrn un is in en Buurnhuus ut dat Johr 1747 upmaakt wurrn.
- De „Amtshoff“ is hüdigendags de Seet vun dat Amtsgericht. He besteiht ut resten vun en Wall ut dat Middelöller un ut dat Koorn-Tinshuus ut dat Johr 1592.
- Dat Syker „Vorwark“ liggt direktemang bi de vörmolige Forstverwalten an den Utgang vun Syke, wenn een na Schnepke hengeiht. Dor hett fröher de Böver-Kreisdirekter vun de Landkreisen Graafschop Hoya un Deefholt in wahnt.
- Ok de evangeelsch-Luthersche Christuskarken kann een sik ankieken, wenn denn de Döör mol opensteiht.Dat is en Bowark ut de Tiet vun de Neegotik.
Söhns un Döchter vun de Stadt
- Anneliese Kiehne-Tecklenburg (* 2. September 1925 in Barrien), plattdüütsche Schrieversche
- Louis Niebuhr (* 1936 in Syke), Bildhauer
- Ursel Meyer-Wolf (* 1944 in Barrien), plattdüütsche Schrieversche
- Andreas Frömberg (* 1954 in Syke), Bildhauer; 1999 Kulturpries vun den Landkreis Deefholt för Bildhaueree
- Heinrich Schmidt-Barrien (* 19. Januar 1902 in Uthleer/LK Cuxhoben; + 9. Dezember 1996 in Lelendaal), plattdüütschen un hoochdüütschen Dichter
- Rudi Carrell (* 19. Dezember 1934 in Alkmaar, Nedderlannen as Rudolf Wijbrand Kesselaar; † 7. Juli 2006 in Bremen), nedderlannschen Showmaster. He leev in Wachendörp un liggt nu up’n Karkhoff in Hilligenfeld.
- Ilse-Marie Voges (* 18. Januar 1943 in Rist), Ilse-Marie Voges, Journalistin, hoog- un plattdüütsch Schrieversch
Kiek ok bi
- Projekt to'n Sammeln vun plattdüütsche Oortsnaams in de Landkreise Deefholt, Nienborg/Werser un Veern
