En Plantage oder Plantaasch is en groten Bedriev in de Woold- oder Landweertschop, de in Monokultur en Produkt for den Weltmarkt anboon deit. Sunnerlich mehrjöhrige Planten oder Duerkulturen, as Bananen, Kattuun, Holt, Öölpalmen, Koffi, Kakao, Tee, Aaft, Sisal-Agaven, Naturkautschuk un Zuckerrohr weert in Plantagen plant un tagen, man ok eenjöhrige Planten, as Toback un de wecken Aarden vun Kattuun. To en Plantagen höört faken ok grode Anlagen mit to, wo dat losgeiht mit de eersten Tre'e vun't Verarbeiten vun dat Produkt. Plantagen weert nich bloß in de Tropen, man ok rund um de Middellannsche See, in Kalifornien un in Süüdafrika bedreven. De Buer, de en Plantagen bedrieven deit, warrt Planter nömmt.
Dat Woort
Dat Woort Plantage (an un for sik bedutt dat Woort 'dat Insetten vun Paten' (plantes)) is as Lehnwoort in't 17. Johrhunnert ut dat Franzöösche in dat Nedderlannsche un (Platt-) Düütsche utlehnt wurrn, man hüdigendags is dat en Verkehrten Fründ. Dat Woort Plantage for Grote Plantenanlage meent hüdigendags in't Franzöösche un ok in't Engelsche datsülvige, as plantation, d. h. 'Anlaag vun Paten' (plantes)).
