Kleopatra VII.

Kleopatra VII. Philopator (Greeksch:Κλεοπάτρα Θεἁ Φιλοπάτωρ); * 69 v. Chr.; † 12. August 30 v. Chr. in Alexandria) regeer as leste Königin över dat Riek vun de Ptolomäers un as leste Fro up den Throon vun de Pharaonen in dat ole Ägypten vun 51 v. Chr. bit 30 v. Chr.. In de eersten veer Johre hett se toeerst tohopen regeert mit ehrn Broder Ptolomaios XIII.. Man de is al 47 v. Chr. sturven, as he 14 Johre oolt weer. Later hett se mit annere Mannslüde tosamen regeert, vunwegen, datt de Wetten unner de Garantie vun dat Röömsche Riek twee Lüde up'n Throon vörsehn döen. Vun all de Königinnen mit den Naam Kleopatra is Kleopatra VII. mit Afstand de bekanntest.

Se harr sik dat vörnahmen, ehr Riek wedder up en gode Grundlaag to stellen un dat noch ut to boen, man gegen de Weltmacht Rom is se denn doch nich gegenan kamen. Vundeswegen hett se wat anfungen mit de beiden mächtigsten Römers in ehre Tied. Toeerst weer dat Gaius Iulius Caesar un, nadem de an'e Siet bröcht wurrn weer, is dat Marcus Antonius ween. De beiden hefft ehr hulpen, de Macht vun dat Ptolomäerriek düütlich to vermehren. Man as Antonius in den Börgerkrieg gegen den latern Kaiser Augustus slahn wurrn is, keem dat Enne vun ehre Herrschop. Se un Antonius hefft Sülvstmoord maakt un Ägypten is denn to en Provinz vun Rom wurrn.

Dat Drama um de Leevde twuschen Antonius un Kleopatra, dorto, datt de Königin vun Ägypten wat mit Caesar harrt hett, datt hett de Phantasie vun de Minschen al vun de Antike af an anreegt un en ganzen Barg vun grote Schrievers, Komponisten, Malers un (vun dat 20. Johrhunnert af an) ok Filmproduzenten hefft sik dor mit befaat'. Sunnerlich bekannt is William Shakespeare siene Tragödie Antonius and Cleopatra (um 1606/07 rüm).