Zambia atau sacaro rasmi Republik Zambia adolah sabuah nagara nan takuruang daratan di pasimpangan Afrika Tangah, Selatan jo Timur. Biasonyo disabuik barado di Afrika Selatan-Tengah atau Afrika Selatan. Nagara ko babatehan jo Republik Demokratik Kongo di utara, Tanzania di timur laut, Malawi di timur, Mozambik di tenggara, Zimbabwe jo Botswana di selatan, Namibia di barat daya, sarato Angola di barat. Ibu kota nagaranyo iolah Lusaka.
Politik Zambia barado dalam karangko republik demokrasi perwakilan presidensial, di mano Presiden adolah kapalo nagara jo kapalo pamarentahan, sarato sistem multi-partai. Presiden dipiliah malalui hak piliah universal untuak maso jabatan limo tahun. Kuaso legislatif dipacik dek Majelis Nasional nan tadiri dari 156 anggota. Paradilan basifat independen dari eksekutif jo legislatif.
Badasarkan hasia sensus tahun 2022, jumlah panduduak Zambia iolah 19.610.769 jiwa, maningkek dari pakiroan Prospek Populasi Dunia tahun 2022 dimano nagara ko bapanduduak 19.473.125 jiwa pado tahun 2021. Panduduaknyo marupokan multi etnis nan tadiri dari 73 kalompok, sabagian gadang babahaso Bantu. Salain tu, nagara ko sacaro konstitusi marupokan nagara Kristen, namun juo malindungi kababasan baagamo.
