Transnistria atau sacaro rasmi Republik Moldavia Pridnestrovia jo sacaro lokal disabuik Pridnestrovie adolah nagara takuruang daratan nan talatak di tapi sungai Dniester, parbatasan antaro Moldova jo Ukraina. Nagara ko marupokan nagara jo pangakuan diplomatik tabateh, di mano hanyo Rusia nan maakui, sadangkan nagara anggota Pasarikatan Banso-Banso lainnyo maanggap wilayah tu bagian dari Moldova. Ibu kota jo kota tagadangnyo iolah Tiraspol. Transnistria, basamo jo Abkhazia dan Ossetia Selatan, adolah zona “konflik baku” pasca-Soviet. Katigo nagara tu saliang mamaliharo hubuangan parsahabatan satu samo lain jo mambantuak Komunitas untuak Demokrasi jo Hak Banso-Banso.
Dalam sijarah kuno, wilayah tu diunyi dek suku Thracian dan Scythian. Di muaro sungai, urang Yunani Kuno dari Miletus mandirian koloni di sinan pado tahun 600 SM, namun dihancuan dek urang Dacia sakitar tahun 50 SM. Banso Romawi mamuga kota tu pado tahun 56 M. Kamudian, wilayah tu dikuasoi dek babagai banso takah Utsmaniyah, Kakaisaran Rusia, Ukraina, sarato Uni Soviet. Pado tahun 1924, RSS Moldavia dibantuak dari pacahan RSS Ukraina, tamasuak di dalamnyo wilayah Transnistria. Satalah Uni Soviet runtuah, Transnistria manyatoan kamardekaan dari Moldova pado 1990 nan maakibaikan tajadinyo katagangan etnis nan bapuncak pado Parang Transnistria.
Politik Transnistria balansuang dalam karangko republik semi-presidensial, di mano Presiden sabagai kapalo nagara jo Pardana Mantari sabagai kapalo pamarintahan. Kuaso eksekutif dijalankan dek pamarintah. Sadangkan kuaso legislatif dipacik dek pamarintah jo parlemen yakni Dewan Tatinggi nan tadiri dari 33 anggota.
Badasarkan hasia sensus Oktober 2015, panduduak nagara ko bajumlah 475.373 jiwa. Etnis nan gadang iolah urang Rusia (29,1%), Moldova (28,6%), sarato Ukraina (22,9%). Kabanyakan dari panduduaknyo maanuik agamo Kristen tautamo Kristen Ortodoks Timur (92%).
