Harare, sabalumnyo Salisbury, adolah ibu kota jo kota tagadang nagara Zimbabwe. Kota ko mampunyoi laweh 982,3 km2, jo panduduak sabanyak 1.849.600 jiwa sarato wilayah metropolitannyo sabanyak 2.487.209 jiwa pado tahun 2022. Harare talatak di sabalah timur lauik Zimbabwe di wilayah Mashonaland. Kota ko manjadi pusek pamarentahan, ekonomi jo budaya nagara.
Pioneer Column, pasukan sukarelawan militer pamukim nan diorganisasian dek Cecil Rhodes, mandirian kota tu pado 12 September 1890 sabagai sabuah benteang. Awalnyo benteang tu dinamoi Salisbury, baasa dari namo Pardana Mantari Inggirih wakatu itu, Marquis Salisbury ke-3. Salisbury dinyatoan sabagai kotamadya pado tahun 1897 jo kamudian manjadi kota pado tahun 1935. Pasca Parang Dunia II, Salisbury bakambang pasek, utamonyo ditunjuak manjadi ibu kota Federasi Rhodesia jo Nyasaland hinggo pambubaran federasi pado 1963. Wilayah Rhodesia kamudian manjadi nagara Zimbabwe jo Harare sabagai ibu kotanyo.
