Norodom Sihanouk (Khmer:នរោត្តម សីហនុ 31 Oktober 1922 – 15 Oktober 2012) panèka Rato Kamboja ḍâri taon 1941 kantos 1955 bân ḍâri taon 1993 kantos 2004. Orèng Kamboja kennal mènangka Samdech Euv ( bhâsa Khmer: Rato-Rama). È bâkto oḍi'na, Nâghârâ Kamboja ngalamè bânnya' obâ'ân ḍâlem abhângon pâmarènta'an, molaè ḍâri Protektorat Prancis Kamboja (sampè' taon 1953), Karajhâan Awwâl Kamboja (1953–1970), Republik Khmer (1970–1975), Kamboja Ḍemokratik (1975–1979), Republik Ra'yat Kamboja (1997–1979) bân aherra Karajhâan Kamboja Kaḍuwâ' (1993–satèya).
Norodom Sihanouk èpaḍhâḍḍhi rato è taon 1941 è bâbâna pâmarenta'an kolonial Prancis. Saellana Perang Dhunnya II, èpon ajhâlânaghi kampanye ka'angghuy kâmardika'an nâghârâ ḍâri pamarenta'an kolonial Prancis, sè ahèrra marḍhika è taon 1953. È taon 1955, Sihanouk toron tahta bân mâghi tahtana ra ramana, Norodom Suramarit, bân noro' geraghân politik Sangkum. Partai Sangkum mennang è pemilu umum taon 1955, bân Sihanouk è yangka' mènangka Perdana Menteri Kamboja. Saellana ramana sèdâ è taon 1960, Sihanouk ngajuwaghi amandemen konstitusi ka'angghuy ḍhâḍḍhi Kepala Nâgharâ Kamboja, kalaghungan sè èghâḍhui kantos taon 1970. Ḍâri taon 1955 kantos 1970, Sihanouk mârenta Kamboja kalabân sistem partai tunggal, kalabân alasan arbitrase parbiḍhâ'an politik antara Partai Ḍemokrat bân Pracheachon. Maske èpon resmi ngala' posisi netral è ḍâlem loar nâghârâ, namong è praktekna èpon lebbi akor sareng nâghârâ-nâghârâ komunis, husussa Cina, ḍâri Amerika Serikat bân sekutu anti-Komunis.
Carèta Oḍi'
Norodom Sihanouk panèka ana' tongghâl sè èlahèrraghi ḍâri pasangan Norodom Suramarit bân Sisowath Kossamak. Èberri' saran sareng ahli nujum kârajhâân jhâ' bhâkal matè ghi' ngodâ manabi èpèyara è bâbâna kâlowarga ramana, orèng towana pas mâghi Sihanouk ka'angghuy èpèyara sareng emba binè' ḍâri èbhuna, Pat. Bâkto Pat matè, Sihanouk èkala' sareng Kossamak ka'angghuy oḍi' è bengkona emba lakè' ḍâri ramana, Norodom Sutharot. Sutharot mâghi Sihanouk ghâbây èyaso pottrèna, Norodom Ket Kanyamom.
Sihanouk ampon lastare penḍiḍighân ḍhâsarna è Sâkola'an Francois Baudoin bân Sâkola'an Nuon Moniram è Phnom Penh. È bâkto jârèya, èpon èbanto sareng bhântowan obâng ḍâri emba ḍâri èbhuna, Sisowath Monivong, kaangghuy mimpin tim sèpak bola bân kelompok pânampilân amatir. È taon 1936, Sihanouk èkèrèm ka Saigon bân ajhâlânè penḍiḍighân mânengnga è Lycée Chasseloup Laubat, èngghi panèka sâkola'an asrama.