Sexeles

Sexeles, nomida ofisial la Republica de Sexeles (en engles: Republic of Seychelles; en franses: République des Seychelles; en creol sexeles: Repiblik Sesel), es un arcipelago e pais en la Mar Indian. La pais de 115 isolas, de cual sua capital es Victoria, es situada a 1500 cilometres a este de Africa este continental. Otra paises e teritorios de isolas visina inclui Comori, Mayotte (un rejion de Frans), Madagasicara, Réunion (un rejion de Frans) e Mauris a la sude. Con sirca 92 000 abitores, lo ave la popla la plu peti de cualce pais african autocrata; an tal, lo ave plu abitores ca la teritorio brites nomida San Helena, Asension e Tristan da Cunha.

Sexeles es un membro de la Uni African, la Comunia de Developa de Africa Sude, la Comunia de Nasiones e la Nasiones Unida. Pos proclama sua autonomia de la Rena Unida en 1976, Sexeles ia developa de un sosia xef cultival a un economia diversida e fundida sur mercatos, e la cultiva ia es sustituida par la campos rapida cresente de servis e publica, e ance par turisme. De 1976, la produi interna bruta ia setupli cuasi, e la potia de compra ia crese e ia dessesupli cuasi. En anios resente, la governa ia coraji investi esterna per aumenta esta campos. Oji, Sexeles ave la plu alta de la produis interna bruta per testa en Africa, estra la rejiones franses. Lo es un de un cuantia peti de paises en Africa con un indise alta de developa umana. An con la ricia economial nova de la pais, multe povria resta, causada par un nonegalia de revenu entre la plu altas de mundo, e par un distribui basa de ricia.

La linguas major es creol 91.8%, engles 4.9% (ofisial), e otras 3.1% (2002)