Masa es un cualia inerente de un corpo. On ia crede tradisional ce lo es relatada a la cuantia de materia en un corpo, asta la descovre de la atom e la fisica de particulas. On ia trova ce atomes diferente e particulas elemental diferente, teorial con la mesma cuantia de materia, ave an tal masas diferente. Masa en fisica moderna ave definis multiple cual es consetal distinguida, ma fisical egal. Masa pote es esperimental definida como un mesura de la inertia de la corpo, sinifiante la resiste a aselera cuando un forte resultante es aplicada. La masa de un ojeto determina ance la fortia de sua atrae gravital a otra corpos.
La unia fundal SI de masa es la cilogram (kg). En fisica, masa no es la mesma como pesa, an si masa es frecuente determinada par mesura la pesa de la ojeto usante un balansa de mola, en loca de un balansa de masa cual compara lo direta con masas conoseda. Un ojeto sur la Luna ta pesa min ca lo pesa sur la Tera par causa de la gravita plu basa, ma lo ta ave ancora la mesma masa. Esta es car pesa es un forte, ma masa es la cualia cual (con gravita) determina la fortia de esta forte.
En la model standard de fisica, on crede ce la masa de particulas elemental es un resulta de sua copula con la boson de Higgs en lo cual es conoseda como la macina de Brout-Englert-Higgs.
