De Viking-Programm vun der NASA gëllt als en Héichpunkt an der Mars-Fuerschung. Déi zwou Raumsonden Viking 1 an 2 waren den 20. Juli an den 3. September 1976 erfollegräich gelant an hunn zanter Mars 3 nees Biller vun der Marsuewerfläch op d'Äerd geschéckt.
De Programm gouf no de Wikinger, déi als éischt an Amerika geseegelt waren, genannt.
Missiounen
2 images
All eenzel Viking-Sond bestoung aus enger Mammen- an Duechtersond. D'Mammesond sollt eng Ëmlafbunn (Orbit) ëm de Mars aschloen, an duerno sollt d'Duechtersond sech oftrennen an op der Uewerfläch vum Planéit landen.
- D'Viking 1 gouf den 20. August 1975 vum Launch Complex 41 op Cape Canaveral mat enger Titan 3E/Centaur gestart. Se hat hir Ëmlafbunn ëm de Mars den 19. Juni 1976 erreecht. D'Duechtersond ass den 20. Juli 1976 an der Landschaft Chryse Planitia gelant. Mam Orbiter gouf bis de 7. August 1980 de Kontakt gehalen, mam Lander souguer bis den 11. November 1982. De Lander gouf de 7. Januar 1982 no engem Wëssenschaftler dee beim Projet matgeschafft hat, an Thomas A. Mutch Memorial Station ëmgenannt.
- D'Viking 2 gouf den 9. September 1975 mam selwechte Rakéitentyp vun der selwechter Startramp aus gestart. Si hat hir Ëmlafbunn de 7. August 1976 erreecht. D'Landung war den 3. September 1976 an der flaacher Géigend Utopia Planitia. De Kontakt mam Orbiter hat bis de 25. September 1978 gehalen, a bis den 11. Abrëll 1980 dee mam Lander. De Lander gouf 2001 posthum nom Grënner vun der NASA Academy an Gerald Soffen Memorial Station ëmgenannt.
Daten
- Béid Sonde ware mat enger Titan3E/Centaur-Rakéit gestart ginn.
- D'Sonden haten e Gewiicht vu ronn 2.900 Kilogramm, dovun 2.300 kg op d'Mammesond a 600 kg op d'Duechtersond.
- Déi béid Orbiter hate 37.000 (Viking 1) an 19.000 (Viking 2) Biller vum Planéit Mars a senge Mounden Deimos a Phobos iwwermëttelt.
- D'Lander hate jiddweree ronn 2.300 Biller iwwermëttelt.
- Déi ganz Missioun hat ongeféier 1 Milliard Dollar kascht.
Kuckt och
- Lëscht vun onbemannte Raumfaartmissiounen
- Lëscht vu kënschtlechen Objeten um Mars
