De Konstantínos Gavrás (gr.: Κωνσταντίνος Γαβράς), bekannt als Costa-Gavras, gebuer den 12. Februar 1933 zu Loutra Iraias, Arkadien, Griicheland, ass ee griichesch-franséische Filmregisseur an Dréibuchauteur. Hien ass bekannt fir seng politesch engagéiert Filmer, fir déi e munnech Präisser kritt huet.
Liewen
Dem Costa-Gavras säi Papp war Regierungsbeamten, deen an der Zäit vun der däitscher Besatzung am Zweete Weltkrich an der kommunistescher Resistenz aktiv war. 1945 ass d'Famill op Athen geplënnert, mä de Papp huet nom Ausbroch vum Griichesche Biergerkrich 1946 seng Plaz verluer.
1954 ass de Costa-Gavras a Frankräich ausgewandert, well en a Griicheland verbuede kritt hat, ze studéieren. 1956 krut hien déi franséisch Nationalitéit. Hien huet ufanks Komparatistik op der Sorbonne studéiert, mä huet sech dann um Institut des hautes études cinématographiques ageschriwwen, wou en en Diplom a Regie a Filmproduktion krut.
Zanter 1965 mécht hie Filmer. Seng Filmer behandele meeschtens sozial oder politesch Mëssstänn an huelen eng kloer Positioun dozou. Vun 1982 bis 1987, an dann nees zanter 2007 ass hien Direkter vun der Cinémathèque française.
En ettlech vu senge Filmer zielen zu de Klassiker vum engagéierte polittesche Film, wéi Z (Oscar fir dee beschten net-engleschsproochege Film 1969 a Jurypräis zu Cannes), deen d'Hannergrënn vum Opriichte vun der griichescher Diktatur vun de Colonellen an den 1960er Joren thematisiéiert; État de siège, deen d'Resistenz vun der Tupamaros géint déi vun den USA ënnerstëtzte Militärdiktatur an Uruguay als Theema huet oder Missing (Gëlle Palm 1982, Oscar fir d'Adaptatioun), deen zu der Zäit vum Militärputsch 1973 am Chile spillt a weist, wéi d'USA sech fir d'Asetze vum Pinochet-Regime engagéiert hunn.
An de leschte Jore sëtzt hie sech mat den Auswierkunge vun der globaliséierter Welt an der onerbittlecher Logik vum kapitalistesche System op d'Individuum auserneen.
Filmographie
Kino
- 1958: Les ratés - (Kuerzfilm)
- 1965: Compartiment tueurs - Haaptacteuren: Catherine Allégret, Jacques Perrin, Simone Signoret
- 1966: Un homme de trop - Haaptacteuren: Jean-Claude Brialy, Bruno Cremer, Jacques Perrin
- 1968: Z - Haaptacteuren: Yves Montand, Irene Papas, Jean-Louis Trintignant
- 1969: L'aveu - Haaptacteuren: Yves Montand, Simone Signoret, Gabriele Ferzetti
- 1972: État de siège - Haaptacteuren: Yves Montand, Renato Salvatori, O.E. Hasse
- 1975: Section spéciale - Haaptacteuren: Louis Seigner, Roland Bertin, Michael Lonsdale
- 1979: Clair de femme - Haaptacteuren: Yves Montand, Romy Schneider, Romolo Valli
- 1982: Missing - Haaptacteuren: Jack Lemmon, Sissy Spacek, Melanie Mayron
- 1983: Hanna K. - Haaptacteuren: Jill Clayburgh, Jean Yanne, Gabriel Byrne
- 1986: Conseil de famille - Haaptacteuren: Johnny Hallyday, Fanny Ardant, Guy Marchand
- 1988: Betrayed - Haaptacteuren: Debra Winger, Tom Berenger, John Heard
- 1989: Music Box - Haaptacteuren: Jessica Lange, Armin Mueller-Stahl, Frederic Forrest
- 1991: Contre l'oubli - Episod: Kim Song-Man
- 1993: La petite apocalypse - Haaptacteuren: André Dussollier, Pierre Arditi, Jirí Menzel
- 1991: À propos de Nice, la suite - Episod: Les Kankobals
- 1997: Mad City - Haaptacteuren: John Travolta, Dustin Hoffman, Alan Alda
- 2002: Amen - Haaptacteuren: Mathieu Kassovitz, Ulrich Tukur, Ulrich Mühe
- 2005: Le couperet - Haaptacteuren: José Garcia, Karin Viard, Ulrich Tukur
- 2009: Eden à l'ouest - Haaptacteuren: Riccardo Scamarcio, Odysseas Papaspiliopoulos, Léa Wiazemsky
- 2012: Le capital - Haaptacteuren: Gad Elmaleh, Gabriel Byrne, Natacha Régnier
- 2019: Adults in the Room - Haaptacteuren: Christos Loulis, Alexandros Bourdoumis, Ulrich Tukur
- 2019: Le dernier souffle - Haaptacteuren: Denis Podalydès, Kad Merad, Marilyne Canto
Um Spaweck
Commons: Costa-Gavras – Biller, Videoen an Audiodateien
- Portrait/Biographie op prisma-online.de
- «Wie die Machtpyramide funktioniert - das ist Politik» - Interview mam Martin Walder op nzz.ch, 21. September 2008
