Athum (Francogallice Ath, Picardice Ât, Batave Aat) est urbs Belgica in provincia Hannoniae sita. Incolarum 28 543 habet. Sedes est iudicis pacis.
Apud Athum Denderae(fr) altera occidentalis vel magna altera orientalis vel parva (etiam Arbra, Asbra vel Arbor) dictae confluunt.
Athum stationem ferriviariam habet ad lineas ferriviarias inter Gerardimontium(nl) et Montes et inter Turnacum et Bruxellas.
Die Iovis Athi forum septimanale est, verisimiliter ex anno 1166, certe ex anno 1368.
Quotannis mense Augusto fit Ducasse d'Ath, processio gigantum.
Regiones
Athum in 19 regiones divisum est quae ante annum 1977 communia sui iuris erant:
- Arbor (Arbre)
- Athum (Ath)
- Bovinia (Bouvignies)
- Gilligenium (Ghislenghien)
- Gisbecca (Gibecq)
- Hospiticum (Ostiches)
- Hultacum (Houtaing)
- Iserna (Isières)
- Lingacum (Lanquesaint)
- Ligniacum vel Linea (Ligne)
- Maffla (Maffle)
- Melinus Episcopalis (Meslin-l'Évêque)
- Mulbacum (Moulbaix)
- Rebacum (Rebaix)
- Silva Maioni (Mainvault)
- Vadum Ericii (Irchonwelz)
- Villaris Nostrae Dominae (Villers-Notre-Dame)
- Villaris Sancti Amandi (Villers-Saint-Amand)
- Vurminica (Ormeignies – cum vico Altrepia (Autreppe))
Historia
Prima mentio Athi in litteris erat anno 1079. Anno 1136, Balduinus IV, comes Hannoniae terram Athensem emit et anno 1166 aedificationem castri turrisque dictae "Burbant" apud confluentem ambarum Denderarum incepit.
Scholae
Athi sunt 20 scholae primariae (14 publicae et 6 Catholicae).
Scholae secundariae publicae sunt Athenaeum Regale Athense (Athénée Royal d'Ath), Institutum Technicum Communitatis Francicae Renatae Joffroy (Institut Technique de la Communauté française Renée Joffroy) et Institutum Provinciale Educationis Secundariae (Institut Provincial d'Enseignement Secondaire – acronymo IPES).
Scholae secundariae Catholicae sunt Collegium Sancti Iuliani (Collège Saint-Julien), Institutum Technicum Liberum (Institut Technique Libre), et pars Collegii Visitationis-La Berlière Lessiniensis (Collège Visitation-La Berlière) in situ "La Berlière" Hultaci.
Apud IPES etiam est pars Scholae Superioris Condorcet (Haute École Condorcet) quae schola educationis superioris Provinciae Hannoniae est.
Cultus religiosi et cosmotheoreticus
Ecclesiae Catholicae Romanae
Numerosi sunt aedificii cultus Catholici Romani:
- in Atho proprio: ecclesiae Sancti Iuliani et Sancti Martini; sacellum Nostrae Dominae Lauretanae
- Altrepiae: ecclesia Nostrae Dominae Lapurdi
- Arbore: ecclesia Sancti Ioannis Evangelistae
- Boviniae: ecclesia Sanctae Virginis
- Gilligenii: ecclesia Sancti Ioannis Evangelistae
- Gisbeccae: ecclesia Sancti Petri
- Hospitici: ecclesia Sancti Petri
- Hultaci: ecclesia Sancti Quirini
- Isernae: ecclesia Sancti Petri
- Lingaci: ecclesia Sancti Martini
- Lineae: ecclesia Nostrae Dominae Visitationis
- Mafflae: ecclesia Sanctae Waldetrudis
- Melini Episcopali: ecclesia Sancti Petri
- Mulbaci: ecclesia Sancti Sulpitii
- Rebaci: ecclesia Sancti Amandi
- Silvae Maioni: ecclesia Sancti Petri
- Vadi Ericii: ecclesia Sancti Dionysii
- Villari Nostrae Dominae: ecclesia Nostrae Dominae
- Villari Sancti Amandi: ecclesia Sancti Amandi
- Vurminicae: ecclesia Sancti Ursmari
Templa Protestantia
Athi duo templa Protestantia sunt, in Via Scriniariorum (rue des Écriniers) et in Via Arcis (rue du Fort).
Ecclesia Orthodoxa
A 1 Septembris 2019 ecclesia Orthodoxa Dacoromana Sanctorum Archangelorum Michaelis et Gabrielis et Sancti Nectarii ab Aegina in pristino sacello Catholico Nostrae Dominae Fatimae, Via ad Montes (chaussée de Mons), sita est.
Atrium Regni Testium Iehovae
Testes Iehovae in Via Ioannis Jaurès (rue Jean-Jaurès) "Atrium Regni" (id est suum templum) habent.
Domus Laicitatis
Athi etiam est "Domus Laicitatis", prius ad initium Viae Portae (rue de la Poterne), nunc in Area Ioanni Zuallart (cour Jean Zuallart), ubi communitas cosmotheoretica "laica" dicta orationes, caerimonias et alia eventa habet.
Meschita
Musulmani quoque Athi habitant sed meschitam in urbe sua nondum habent; meschita proxima Rotnaci sita est. Meschita Athensis nunc aedificatur in Via Moeniae (rue du Rempart).
Pinacotheca
