Helvellyn

Helvellyn ew menedh en Pow an Lydnow tredh lydnow Thirlmere hag Ullswater. Ev ew an treja uhella menedh en Pow an Lydnow ha Pow an Sowson. Esya ew dhe grambla ages Scafell Pike ha Scafell, ha gerys-da ew an menedh, yskydnys gen degow a vilyow a dus pub bledhen. En mis Genver 2018, henwys veu Helvellyn avel an gwella kerdh en Breten Veur en towlen pellwolok ITV ostys gen Julia Bradbury.

An hanow a dheu dhort an geryow Kumbrek, yeth haval dhe Gembrek Koth kowsys e'n a Bow an Sowson bys dhe'n 12ves kansvledhen, ow styrya Hal Velyn.

Gwres veu karrygi loskvenydhyek an menedh en kowdoll hen venedh tan a'n Oos Ordowek nanj ew 450 milvil a vledhydnyow. E'n Oos Rew, chanjyes veu an tirwedh gen rewlivans rag gul tri homm down gen kilfosow serth diberthys gen diw grib. Lenwys ew an kres a'n tri homm gen lydn, Red Tarn. Meur hy hanow ew udn grib, Striding Edge, drefen hy bos mar serth. Ema dhe niver a vernansow hwarvedhys dres an bledhydnyow awos droglammow.

Usys veu an menedh e'n 19ves kansvledhen rag balweyth plobm.

Topp an menedh ew nebes gwastas, gen ledrow pur serth dhe'n est. Mar wastas ew dell wrug jynn ebron tira war ev en 1926. An uhella poynt ew 950m (3120 tros-hes) a ugh level an mor.

Ema dhe dus kerdhys dres an menedh nanj ew lies bledhen, bes touryji a dhallathas kerdhes war an menedh nanj ew diwedh an 18ves kansvledhen. Samuel Taylor Coleridge ha William Wordsworth a gerdhas Helvellyn en 1800.