Elven gemyk ew dysprosiom, niver 66 e'n Vosen Beriodek. Y arwodh ew Dy. An hanow a dheu dhort an ger Greka dysprositos, ow styrya kalish dhe dhiskudha. Onan a'n elvednow dor-tanow po lanthanid ew. Pur vian ew radn dysprosiom e'n korf denel.
Diskudhys veu gen Paul-Émile Lecoq de Boisbaudran en 1886 en Paris. Askorrys ew a-dro dhe 100 tonnas pub bledhen, avel an olkan ha'y oksid. Pur vedhel ew an olkan, usys dhe wul kesolkenyow tednvenek, warbarth ha neodymiom, horn ha boron. Devnydh aral ew lugern pur lew der usya dysprosiom iodid. Usys ew en dasoberoryon nuklerek rag sugna nywtrons. Devnydhyow erel ew en priweyth ha plasennow optykal.
Dysprosiom ew diwweyth moy pals ages sten e'n kerhydnedh. Poos atomek dysprosiom ew 162.5, y boynt teudhi ew 1412°C ha'y boynt bryjyon ew 2560°C. Y dhosedh ew 8.6kg an liter. Alkan golow arhansek ew.
Mirva
Ma an erthygel ma usya an Furv Skrifys Savonek a-barth Kernowek diwedhes.
